Quantencomputer

E Quantecomputer bzw. Quanterächner isch e Computer, wo noch de Gsetz vo dr Quantemechanik funktioniert. Im Underschiid zum Digitalcomputer schafft er nit uf dr Basis vo de Gsetz vo dr klassische Physik bzw. Informatik, sondern uf dr Basis vo quantemechanische Zueständ (Qubit), was sich wäsentlig vo de Regle vo de klassische Theorie underscheidet. Die Zueständ wird noch quantemechanische Prinzipie verarbeitet. Dodrbii si vor allem

1. s Superpositionsprinzip (d. h. die quantemechanischi Koheränz, analog zu de Koheränzeffekt in dr Optik, wo sust inkohärent isch, lueg z. B. Holographie) und
2. die sogenannti Quanteverschränggig

vo bsundriger Bedütig.

Theoretischi Studie löön lo vermuete, ass me mit dene Effekt bestimmti Problem in dr Informatik wäsentlig effizienter chönnt löse as mit klassische Computer. Bispil vo sonige Broblem si d Suechi in extrem groosse Datebanke (Grover-Algorithmus) und d Produktzerlegig vo extrem lange Zahle (Shor-Algorithmus) - e Broblem, wo für d Sicherheit vo dr e-Mail-Übermittlig von ere erheblige Relevanz isch (Quantekryptographii).

Dr Quantecomputer isch zur Ziit e Konzäpt, wo im Grosse und Ganze immer no theoretisch isch. Me het aber scho vili Vorschleg gmacht, wie me e Quantecomputer chönnt realisiere, und im ene chliine Massstab si schon e baar vo dene Konzept im Labor usbrobiert worde, und me het Quantecomputer mit e baar Qubit realisiert. Vom ene praktische Nutze isch me aber no wiit ewäg.

Dä Artikel basiert uff ere fräie Übersetzig vu dere Version vum Artikel „Quantencomputer“ vu de dütsche Wikipedia. E Liste vu de Autore un Versione isch do z finde.