Enemay nano to’as a pisacacak no Pangcah

O sacalowayay a pisacacak ko matiniay. Caay ka cisioy, caay ka cidangah ato kalomaamaan a sapisacacak. Sa’opo han ko kasoy, litkat han ko lamal, ano malaflaf to ko lamal i, pateli han ko nisolsolan a titi, ano eca o futing, ato kalomaamaan a nga’ayay todohen a kakaenen.

O nga’ayay a sapina’ang patahiraw to kakaenen ko matiniay a pisacacak. Sanga’en ko cadada i safaled no lamal, ta tatingen ko titi ano eca o futing ato kalomaamaan nga’ayay ’id’iden a kakaenen. Ano marad ko cadada i, manga’ay to a pateli han aca ko ’a’id’iden ta safelifelinen tangasa i kacacakan.

Tademen i ’afo ko fonga ano eca o nitafoan to papah no lengac ato kilang a kakaenen, ta romromen ko ’atang a milaflaf to lamal i safaled noya nitademan a kakaenen. Maedeng ko kahalafin i, wanik han to ko kasoy ato ’atang a mikorkor koya kakaenen. O kacalowayan a pisacacak ko matiniay i palapalaan. Anini adihay to ko macowcowaay a satafo, mangalef to ko kacalowayan a mitamek.

I tini i palapalaan, ano awaawaay ko sapicacak a dangadangah, sacifar han aca ko palo’, teli han ko maamaan kaolahan a kakaenen i cifar, patatodongen ko pipananom, ta todohen ko rimadacay a matatongay fokeloh. Ano kahengang to ko fokeloh i, pacefong han to i cifar koya fokeloh, caay pahoda macacak ko nisafelan. O sakinopangcahan a cecay ko matiniay a nipisafel.

O nirayrayan nano to’as ko matiniay a nipisafel. Halafin to a kifana’an no mita i likisi ko kaci’atomo no Pangcah. Mataneng ko fafahiyan no Pangcah a misanga’ to ’atomo nano to’as, saka o matelangay pisacacak ko masakafiay. Ano ira ko ’atomo, pararo’ong han aca ko tolo a fokeloh, manga’ay to a miteli to ’atomo a mitangtang. Ano maamaan to a kakaenen, pananom han ko ’atomo ta pacefongen ko sasafelen, caay pahoda ko nipitala, manga’ay to a kaenen.

6. Micaengaray(蒸煮法) Kalifotan to mamang ko matiniay a pisacacak, nawhan i, ira a:ca ko mahod ta manga’ay a micaengar. O sapisahakhak a cecay ko matiniay a pisacacak no Pangcah. I sa’ayaw, laloen ho ko koetengay a felac to pangkiw no romi’ad, herek noyaan, sefsefen a mihetec koya felac,paroen i mahod ta pacaengaren i dangah a micacak. O lahod ko sapicacak to hakhak, saka haladhad a kaenen ko hakhak ^[1]

1. ↑ 吳明義. (2011). Wikipedia 維基百科 族語詞條試寫─原住民族語詞條 2011作品集. 教育部.