Мроя (гурт)

Мроя
Мроя на «Басовішчы-2009».
Асноўная інфармацыя
Жанр	рок
Гады	1981—1994
Краіна	Беларусь
Горад	Мінск
Мова песень	беларуская
Лэйбл	Мелодыя, Ковчег, БМАgroup
Склад	Лявон Вольскі Юрась Ляўкоў Алег Дземідовіч Піт Паўлаў
Былыя ўдзельнікі	Уладзімір Давыдоўскі Венедыкт Конеў-Пятушкевіч Алег Піпін Леанід Шырын Віктар Смольскі Віктар Шот Юрась Цянкевіч
Іншыя праекты	«N.R.M.» «Крамбамбуля» «Garadzkija» «Zet»
Медыяфайлы на Вікісховішчы

«Мро́я» — беларускі рок-гурт.

Гурт «Мроя» заснаваны ў 1981 годзе студэнтамі другога курса Мінскай мастацкай вучэльні Лявонам Вольскім і Уладзімірам Давыдоўскім. Вольскі спяваў ды граў на польскім сынтэзатары-іёніцы, Давыдоўскі спачатку граў на бас-гітары, потым — на барысаўскай «Фарманце». Неўзабаве да гурта далучыўся школьны знаёмы Давыдоўскага Юрась Ляўкоў, які пачаў граць на бас-гітары. Потым далучыўся аднагрупнік Вольскага Алег Дземідовіч і пачаў граць на барабанах. Гурт спачатку ўзяў назву «Эскалатор». Першы канцэрт адбыўся 7 лістапада 1981 года. Спачатку песні ствараліся і выконваліся па-руску, але паступова гурт перайшоў на беларускія песні. Музычны стыль фармаваўся пад уплывам такіх гуртоў, як «The Beatles» і «Машина времени». Рэпетыцыі праводзіліся спачатку ў цесным пакойчыку ў вучэльні, потым у розных службовых памяшканнях (нават у вёсцы Дзегцяроўка). У 1984 годзе «Мроя» выступіла з вулічным канцэртам у Траецкім прадмесці, на якім прысутнічаў Піт Паўлаў. У 1985 годзе, пасля заканчэння вучэльні Лявона, Уладзіміра і Алега забралі на тэрміновую службу ў войска. Улетку 1986 года гурт сабраўся зноў. На першых этапах гурт запісаў некалькі альбомаў на магнітных касетах, актыўна канцэртаваў, рэпетыцыі праходзілі ў сутарэннях Дому літаратара. У 1987 годзе «Талака» зладзіла паход супраць будаўніцтва Дзвінскай ГЭС, у якім прынялі ўдзел і музыкі «Мроі». За гэты ўдзел іх пазбавілі магчымасці рэпетаваць у Доме літаратара. У 1989 годзе — падчас перабудовы, «Мроя» запісала альбом на перасоўнай студыі «Мелодыя» «Дваццаць восьмая зорка», гукарэжысёрам якога быў Аляксандр Шцільман. Пасля зыходу Уладзіміра Давыдоўскага 10 верасня 1989 года тры гады ў гурце граў Венедыкт Конеў-Пятушкевіч. 24 верасня 1989 года гурт выступіў на фестывалі «Чырвона рута» ў Чарнаўцах, дзе выканалі песні «Шмат», «Аўстралійская полька» ды «Мама-мафія». На працягу 1992—1993 гадоў у гурце змянілася некалькі гітарыстаў, якія не адпавядалі стылістыцы «Мроі». У 1993 годзе пры дапамозе Згуртавання беларусаў свету на кампакт-касетах выйшаў зборнік «Выбраныя песьні 1989—1993», у які ўвайшлі новыя песні. Часткова з-за рознагалоссяў у самім гурце, часткова з-за канкурэнцыі з боку іншых — больш маладых гуртоў у верасні 1994 года ўдзельнікі «Мроі» прыпыняюць працу з-за фармальных прычын. Праз пэўны час было прынятае рашэнне ўзяць назву «N.R.M.» і змяніць музычны стыль.

У 2009 годзе на юбілейным, 20-м «Басовішчы» гурт часова адрадзіўся дзеля выканання некалькіх старых песняў у аўтэнтычнай вопратцы. У гэтым жа годзе «БМА-group» зрабіла перавыданне альбома «Дваццаць восьмая зорка» на CD, у якое ўключыла дзьве дадатковыя песні і відэа з канцэрту ў 1993-м годзе.

• Лявон Вольскі — спеў, клавішныя (1981—1994)
• Уладзімір Давыдоўскі — гітара (1981—1989)
• Юрась Ляўкоў — бас-гітара (1981—1994)
• Алег Дземідовіч — барабаны, спеў (1981—1994)
• Сяргей Лоскутаў — барабаны, потым гітара (1981)
• Венедыкт Конеў-Пятушкевіч — гітара (1989—1992)
• Алег Піпін — гітара (1992)
• Леанід Шырын — гітара (ліпень, 1992)
• Віктар Шот — гітара (верасень, 1992)
• Юрась Цянкевіч — перкусія (ад 1992)
• Віктар Смольскі — гітара (1993)
• Піт Паўлаў — гітара (1993—1994)

• Стары храм (1984 — дэма кампакт-касета, 1986)
• Зрок (1987 — кампакт-касета)
• Студыя БМ (1988-1989 — кампакт-касета)
• Дваццаць восьмая зорка («Мелодыя», 1990, перавыдадзены ў 1997 і 2009)
• Біяполе (1991 — кампакт-касета, перавыдадзены ў 1997)

Усе альбомы студыйныя. Першыя два альбомы пазней не выдаваліся.

• Лепшыя песні з праграмаў 1987—1990 гадоў («Ковчег», 1992)
• Выбраныя песьні 1989—1993 (ЗБС, 1993)^[1]

• Рок супраць рэвалюцыяў (жывы запіс «Глыток віна і луста хлеба» ды «Дзяўчына з чароўнаю ўсьмешкай», 1993)
• Генералы айчыннага року («Я — рок-музыкант», 2004)
• Чарнобыльскі вецер («Шмат», 2006)
• Дыхаць! («Краіна крывавых дажджоў», 2006)

У праект «Рок супраць рэвалюцыяў» увайшлі дзве песні, якія не трапілі ў альбомы, у запісе ўдзельнічаў Піт Паўлаў.

• Прыз глядацкіх сымпатый на фэсце «Рок-крок» (1988, Гродна)
• Лаўрэаты фестываля «Тры колеры — 3» (1990)
• Лаўрэаты фестываля «Басовішча» (1991, Польшча)

• Дзятліковіч Віктар. Іх Мроя. Іх N.R.M.. — Мінск: «Сучасны літаратар», 2005. — 320+32 вкл. с.
• Д.П., А. Адамчык. «МРОЯ» // Энцыклапедыя беларускай папулярнай музыкі (бел.) / уклад. Дз. Падбярэзскі і інш. — Мінск: Зміцер Колас, 2008. — С. 189–190. — 368 с. — 2 000 экз. — ISBN 978-985-6783-42-8.

• Сяргей Сахараў. Хроніка гурту «Мроя» //Arche №2/2001. Архівавана 23 лістапада 2004.
• Артыкул пра «Мрою» ў кнізе «Залатыя дыскі беларускага рок-н-рола» на партале Kamunikat
• Артыкул пра «Мрою» ў «Залі Славы» парталу Тузін Гітоў
• Гісторыя аднаго фотасэту: Вольскі і гурт «Мроя» ў Менску 80-х(недаступная спасылка) // 34mag.net (бел.)