|
A PiazzettaA Piazzetta hè un situ nantu à u web è un giurnale in lingua corsa. U situ hè statu lanciatu di dicembre 2007[1], da una squadra di ghjovani bastiacci. U giurnale hè statu lanciatu di ferraghju 2009. A Piazzetta tratta di manera satirica di l'attualità corsa o internaziunale. U blogguU bloggu s'intituleghja "blog scherzosu, puliticamente scurrettu è certe volte appena gattivu". Si tratta d'ogni sughjettu d'attualità, corsa o internaziunale, di pulitica, di cultura corsa, di musica è di tennulugia muderna, ecc., d'ogni tema chì pò interessà i ghjovani è ancu i menu ghjovani. Detta quessa, ci vole à aghjunghje chì e tematiche liate di modu "tradiziunale" à a lingua corsa sò belle rinnuvate. Hè un estru mudernu è ghjovanu chì detta a scrittura è l'usu di a lingua, ringraziendu à Diu, ùn hè micca sempre accademicu. S'è a tunalità glubale hè piuttostu scherzosa è à volte "gattiva", si ponu ritruvà attempu u spiritu bastiacciu di a macagna è una riflessione critica nant'à a Corsica. Ma soprattuttu, A Piazzetta hè un situ da fà ride, è l'articuli ridiculi ùn mancanu micca. I scrittori si chjamanu Ussamà Ben Lazezu, U Sgaiuffu, U Webmaestru, Pichjettu. Si po aghjunghje ch'è u situ cumprende dinù articuli cumpletti annantu à temi culturali. Certi sugetti sò trattati incù prufundezza è certe volte ùn anu micca equivalente in lingua francese o inglese. Si pò cità per esempiu, frà altri, l'articuli annantu à : Ghjuvan Paulu Poletti, Canta u Populu Corsu, a bandera corsa. U situ hè apertu dinù à e cullaborazione di i littori: ci hè un foru, è ancu una parte intitulata "Tribuna libera di i lettori" ind'ellu si pò pustà cummunicazione. U ghjurnaleÀ parte da frivaghju 2009, A Piazzetta hà lanciatu dinù un ghjurnale. 'Ssu ghjurnale hè distribuitu gratisi in a Corsica sana. Avendu vintu un cuncorsu intitulatu "ghjovani in mossa", i redattori di A Piazzetta anu sceltu di cunsacrà u premiu à finanzà i primi esemplarii di u ghjurnale gratisi. Nove numeri di u ghjurnale sò stati esciuti sin'à avà. A Piazzetta si prisenta cum'è un esempiu di ciò chì si pò fà per rinvivisce a lingua corsa. S'è l'iniziative cum'è A Piazzetta si multiplicheghjanu, ci dà à pensà ch'è a lingua corsa, minacciata di sparizione da quì à a fine di u seculu XXI (cum'è 90 per centu di e lingue di a pianetta), a di pò fà à francà u seculu. Liame
|
