Share to:

13/13 Sumarioa

13/13 Sumarioa Espainiako Auzitegi Nazionalak zuzendutako prozesu judizial bat da, euskal presoen abokatuak edo preso horien elkartasun sareetan ibilitako zazpi pertsona epaitu dituena. Prozesuaren abiapuntua Guardia Zibilak Bilbon eta Donostian egindako atxiloketa eta miaketa batzuk izan ziren. Epaiketa 2021eko uztailaren 12an hasi zen[1] eta 2022ko martxoaren 31n sententzia eman zen, lau euskal auzipeturi zazpi eta hiru urte arteko espetxe zigorrak ezarriz eta beste hirurak absolbituz. Alfonso Zenon defentsako abokatuak irekita utzi zuen helegitea aurkezteko aukera. Sumarioak Ángela Murillo magistratua izan zuen epaimahaiburu, Carmen Paloma González eta Juan Francisco Martel epaileek lagundurik. 2026ko urtarrilaren 7an, apelazioan, Espainiako Auzitegi Gorenak berretsi egin zituen Arantxa Zulueta eta Jon Enparantzaren kondenak, eta Naia Zuriarrainenak zein Iker Sarriegirenak laburtu. Defentsak Espainiako Konstituzio Auzitegian helegitea aurkeztuko zuela iragarri zuen.

Espainiako Auzitegi Nazionala Madrilen

Auzipetu batek baino gehiagok torturak salatu zituzten, testigantza gogorrak emanez, eta tortura horiek egiaztatuak izan ziren Istanbul Protokoloaren arabera. Bestalde, Demokrazia eta Giza Eskubideen Aldeko Europako Abokatuen Elkarteak (ELDHk) prozesua bertan behera uzteko erreklamatu zuen, prozeduran askotariko irregulartasunak atzeman ondoren eta berme judizialak urratu zirela argudiatuta. Zuzenbideko ehun profesionalek baino gehiagok prozesuko irregulartasunak salatzeko adierazpen bat plazaratu zuten. Prozesuan, Juan Mari Jauregi auzipetua eta Egia auzoko militante donostiarra hil zen gaitz baten ondorioz.

11/13 Makrosumarioko gertaerak

11/13 Makrosumarioaren kontrako manifestazioa Bilbon (2014)
Amaia Izko abokatua Auzitegi Nazional aurrean, zigorrei buruzko akordioaren berri ematen (11/13 Sumarioa)

2014ko urtarrilaren 8an, Guardia Zibilak Arantza Zulueta, Jon Enparantza eta beste zazpi pertsona atxilotu zituen, euskal presoekin ETAko ordezkari lanak egiten zituztelako akusaziopean. Atxiloaldiaren ondoren, espetxeratuak izan ziren.[2] 2013tik, 46 lagun atxilotu zituzten 2016ko urtarril arte euskal presoen aldeko elkartasunagatik.

Zuluetak eta Enparantzak erabateko bakartze baldintza gogorretan izan ziren espetxeratuak, salbuespenekoak ziren neurrien arabera, beste presoekin harremanik izateko aukerarik gabe, artean ere espetxealdi prebentiboan izan arren. Jon Enparantzaren emaztea Maider Alustizak 500 eguneko erabateko bakartze egoera horren azalpen xehea eman zuen.

Une batean, fiskalak Zulueta eta Enparantzaren patua epaileek ez, baizik eta "ministroek" erabakiko zutela ere adierazi zuen.[3] Alfonso Zenon haien abokatuak legez kanpokotzat jo zuen haien egoera 2014ko apirilean.[2] Guardia Zibilaren urte bereko interbentzioak, haren miaketek eta atxiloketek instrukzio bati eta 11/13 Makrosumarioari eman zioten hasiera. Bost ekinbide judizial bildu ziren 11/13 Makrosumario bakarrean:[4] Herrira, Bitartekariak, Abokatuak, Jaiki Hadi eta Etxerat.[5]

Epaiketa

Auziaren oinarriak

Hego Euskal Herriko hainbat pertsonaren kontra ETArekin lotura izatea egotzita hasitako prozesu judiziala da. Epailearen aurreko ikustaldiak Espainiako Auzitegi Nazionalean 2021eko uztailean hasi arren, prozesuak 2010eko apirilean egindako atxiloketa batzuetan du abiapuntua. Une horretan, hainbat pertsona atxilotu zituzten Grande-Marlaska epailearen agindupean, ETA eta presoen arteko lotura lana egitea leporaturik. Batzuk aske geratu ziren epaitegian aurkeztearen trukean; beste batzuek espetxea saihestu zezaketen 12.000 eta 30.000 euroko kaudimenak ordaintzeko baldintzapean. Epaileak beste bost akusatu espetxeratzea agindu zuen.[6]

Sumarioak Ángela Murillo du epaile. Akusatuen erruztapena Guardia Zibilaren beraren txostenetan oinarritzen da. Epaiketaren bigarren saioan 2021eko uztailaren 14an, akusatuek tortura lekukotzak eman eta salatu zituzten.[7] 13/13 Sumarioan, zazpi abokatu epaitu ziren: Arantza Zulueta, Jon Enparantza, Naia Zuriarrain, Julen Zelarain, Iker Sarriegi, Saioa Agirre eta Nerea Redondo. Juan Mari Jauregi, abokatu izan gabe ere, auzipetuta zegoen; hala ere, ez zen epaitua izan, osasun arazoak zirela tarteko;[8] 2021eko irailean, Jauregi, atxiloketan torturak salatu zituena, gaitz batek jota hil zen.[9] Guztiek ukatu zuten delako Halboka egiturarekin edo ETArekin harremanik izatea. Fiskaltzak 12 urte bana eskatzen ditu Zulueta eta Enparantzarentzat; gainerakoentzat, berriz, 7 urtetik 10era eskatu zituen,[10] guztira, 77 urte.[11]

Grande Marlaska egungo Espainiako barne ministroak agindutako polizia operazio batean atxilotu zituzten akusatuak. Guardia Zibilak ikerketa 2008ko maiatzaren 20an egin sarekada batean Lopez Peñari atzemandako paperen ondorioz hasi zela azaldu du; harekin batera beste pertsona batzuk atxilotu zituzten. Guardia Zibilak 120.000 dokumentu atzeman zituen. Guardia Zibileko poliziek adierazi dutenez, auzipetuek Halboka izeneko egitura batean parte hartzen zuten, aktibo zegoena, eta ETAren "fronte juridiko" batez hitz egin zuten, ustez erakundearen aldeko abokatuek osatua.[8]

Bilakaera

Uztaileko ikustaldiak

Jone Goirizelaia, defentsaren arduradunetako bat

López Peñaren paperez gain, prozesuaren abiapuntua CNIren interbentzioa da. Guardia Zibileko agenteak 2021eko uztailaren 14an adierazi zuenez, Guardia Zibilak informazio bat eskatzen zion CNIri, eta Espainiako Zerbitzu Sekretu horiek kidego armatuko talde horri pasarte jakin bat edo agiri zati bat bidaltzen zion, eta ez osorik; prozedura horrek ez zuen kontrol judizialik.[12] Hala, Ángela Murillo epaimahaiburuak nola defentsak kexua agertu zuten Guardia Zibileko agenteak lekuko gisa deklaratu beharrean, peritua balitz bezala deklaratu duela.[13]

Agente horrek segurtatu zuen bera zela txostenaren egilea, baina bera ez zela miaketan egon, eta bidaltzen zioten informazioen arabera ondu zuela; defentsak, Jone Goirizelaia abokatuaren ardurapean, gaineratu zuen agentea egon ez zen miaketa bateko lekuko lana egiten ari zela.[13] Bigarren agente batek Arantza Zulueta eta Zuriarrainen bulegoaren eta etxebizitzen miaketetan parte hartu zuen eta, horiei buruzko lekukotza eman. Hainbat xehetasun aletu zituen aurkitu eta atzemandako materialaren gainean. Adierazi zuenez, haien bulego eta etxeen miaketan, arraroa iruditu zitzaion gailu informatiko batzuk tokiz kanpo aurkitu izana, adibidez, koadro baten atzealdean edo komuneko kutxa batean.[13]

Iraileko ikustaldiak

2021eko irailaren 8an, berriz hasi ziren epaiketako ikustaldiak. Domingo Arizmendi Gipuzkoako Abokatuen Elkargoko orduko dekanoak adierazi zuen deitu egin ziotela Hernaniko abokatuen bulego batean miaketak egitekoak zirela jakinarazteko. Arreta deitu zion poliziak oso toki jakinetan miatzen zuela. Lekuko batek ere deklaratu zuen, azalduz miaketak baino hiru egun lehenago mugimendu arraroak sumatu zituela, eta Guardia Zibila, aldameneko zuhaitz bat zulatu eta gero, bulego horretako ate parean aritu zirela luzaro zulatzeko makina batekin.[14] Ramon Lasagabasterrek ere hitz egin zuen. 2010ean Bizkaiko Abokatuen Elkargoko kidea zen, eta Arantza Zulueta eta Naia Zuriarrain letraduen bulegoetako miaketetan egon zen, Bilbon eginikoan. Iristean atea zigilatuta zegoela gogoratu zuen, baina aurrez «behartuta». Eta gaineratu zuen: «Sekretu profesionala urratu zen». Epaiketa batzuetako dokumentuak eraman zituztela azaldu zuen, miaketarekin «zerikusirik ez» zutenak.[14]

Irailaren 23an, 13/13 auziko epaiketak Espainiako Auzitegi Nazionalean jarraitu zuen, eta datek, txostenek, artxiboek zein izenek jarri zuten hizpidea. Guardia zibilek hitz egin zuten berriro, Alfontso Zenon eta Aiert Larrarte abokatuen galderei erantzunez, eta ondotik defentsak eskaturiko bi peritu informatikok hartu zuten hitza. Zenonek eta Larrartek guardia zibilei galdegin zieten ea nola lotzen dituzten Arantza Zulueta, Jon Enparantza eta Iker Sarriegi auzipetuen izenak ezizen batzuekin, eta polizien askotariko kontraesan eta zehaztasun faltak azaleratu zituzten abokatuek.[15]

Guardia zibiletako batek adierazi zuen, adibidez, Zulueta ezizen batekin lotzen zutela: hura deituta zegoen Parisen 2010eko urtarrilaren 15ean eginen zen bilera batera joateko. Zuluetak Miarritzetik (Lapurdi) Parisera joateko hegazkin txartel bat hartu zuen egun batzuk lehenagorako, baina guardia zibilak onartu zuen ez zutela Zulueta bilera horretara joan zelako frogarik: «Uste dugu zita horretara joateko zela hegazkin txartela, baina zita horretan egon zenik ezin dugu esan, ezta egin zenik ere».[15] Enparantza abokatuaren Hernaniko (Gipuzkoa) bulegoko esku idorgailu batean zegoen zulo batez mintzatu ziren guardia zibilak, halaber. Haien hitzetan, han atzeman zituzten ustez abokatuek euskal presoekin komunikatzeko erabiltzen zituzten mezuak. Zenonek guardia zibilei galdetu zien ea nola zekiten Enparantzak zulo horren berri zuela: «Ezin dugu esan edukia ezagutzen zuenik. Baina bazekien, noski, hor zegoela: esku idorgailuak ez zuen funtzionatzen».[16]

Enparantzaren etxean atzemandako Zutabe aldizkariez ere galdetu zien Zenonek: ea nola dakiten harenak zirela. Erantzuna: «Atzemandako beste gauzekin testuinguruan jarrita, bazitekeen pertsona horrek argitalpen horiek erabiltzea». Informatikan adituak diren defentsaren perituek deklaratu zuten ondotik, eta informazioa falta zutela nabarmendu zuten. Zehazki, frogetako bat: «Ez dugu eskuratu, eta ez dugu atzeman frogen artxiboan». Jone Goirizelaia abokatuaren galderei erantzunez adierazi zuten, beraz, ezin zutela baieztatu informazio hori dagoenik. Defentsak ikerketan parte hartu zuten agenteek lekuko gisa agertzea eskatu zuen, baina Murillo epaileak errefusatu egin zuen hori; ez zen agente horien nondik norakorik aurkitu. Hain zuzen, defentsak erabakigarritzat jotzen zuen haien lekukotza, haiek prestatu baitzuten Halboka delako txostena.[17] Gabezia hori dela eta, defentsak berriz eskatu zuen epaiketa bertan behera uztea. Ikustaldiak irail amaieran bukatzea aurreikusi bazen ere, Ángela Murillo epaileak atzeratu egin zituen.[16] Epaiketa urriaren 29an zen segitzekoa.[18]

Urriko eta azaroko bilakaera

Espainiako CNIren ikurra

2021eko urriaren 28an, Paz Esteban López CNIko zuzendariak uko egin zion deklaratzeari, Valentín Díaz Blanco Guardia Zibileko jeneral buruak egindako eskaerari erantzunez: ezin ziola eman 13/13 auziko atxiloketan eta miaketetan «ustez» parte hartu zuten CNIko kideei buruzko informaziorik, legeak ez omen ziolako baimentzen. Defentsak uste izan zuen «erabat beharrezkoa» zela CNIko kideek 13/13 auziko epaiketan testigu gisa deklaratzea, eta hori gertatu ahal izateko «ahal zuen guztia» egiteko eskatu zioten Angela Murillo epaileari. Izan ere, epaiketan lekuko eta peritu gisa deklaratu zuten hainbat guardia zibilek onartu zuten CNIko kideek parte hartu egin zutela 13/13 auziko Polizia operazioan eta ikerketan.[19][20]

Hargatik, hurrengo egunean, fiskalak berretsi egin zuen bere zigor eskaera: zazpi eta hemeretzi urte arteko espetxe zigorra Arantza Zuluetaren eta ETAko presoen beste bost abokaturen kontra, egotziz erakunde armatuaren beso juridikoa osatzen zutela.[21] Zulueta eta Enparantza ETAko «buru» jo zituen, Sarriegi eta Zuriarrain, «kide», eta Redondori eta Agirreri «laguntzaile» izatea leporatu zien. Aldiz, José Perals fiskalak eta AVT eta Dignidad y Justicia taldeetako akusazio partikularrek erabaki zuten Julen Zelarainen aurkako akusazioei uko egitea. Fiskal horren ustez, «ETA ez da desagertu».[22][oh 1] Defentsek berretsi zuten ez zela argitu CNIk izan zuen rola, eta epaiketa baliogabetzea eskatu zuten, irregularitateak gertatu zirelakoan.[23]

Auziaren epaia

2022ko martxoaren 31n, Espainiako Auzitegi Nazionalak sumarioaren epaia eman zuen, 549 orrialdekoa.[24] Bertan, espetxe zigorrak zehaztu zizkieten lau auzipeturi, eta beste hiru absolbitu.[25]

Zigorrak

Arantza Zuluetak jaso zuen zigorrik gogorrena: lau urteko zigor bat «erakunde terroristako kide» izateagatik, eta hiru urte eta sei hilabeteko bertze bat «armak eta lehergaiak edukitzeagatik». Guztira, beraz, zazpi urte eta sei hilabeteko zigorra. Jon Enparantzari lau urteko kartzela zigorra ezarri zioten, Naia Zuriarraini hiru urte eta sei hilabetekoa, eta Iker Sarriegiri hiru urte eta egun batekoa: «erakunde terroristako kide» izatea leporatu zieten hirurei. Espainiako Auzitegi Nazionalak jakinarazi zuenez, atzerapenengatiko aringarria onartu zieten. Julen Zelarain, Saioa Agirre eta Nerea Redondo auzipetuak, berriz, absolbitu egin zituen auzitegiak. Zelarainen akusazioak joan den urrian erretiratu zituen fiskalak, eta Agirreri eta Redondori ETAren «laguntzaile» izatea leporatua zieten —ez «kide» izatea—. Guziz libre geratu ziren hirurak.[25]

Sententzia betearazteko, aurretik behin-behinean auzi horretan betetako kartzela zigorrak kendu behar zizkieten ordu arte jasotako espetxe urteei, eta ikusteke geratu zen bertzelako auziengatik betetakoak ere kontuan hartuko ote zizkieten. Alfonso Zenon defentsako abokatuak Berria egunkariari jakinarazi zionez, nolanahi ere, epaia ez zen artean irmoa, eta zabalik geratu zen helegitea jartzeko aukera. Zigortutako auzipetuek ez zuten espero espetxeratzerik.[25]

Arrazoibidea

Sententziaren 549 orrietan, dokumentuak zehazten zuen auzipetuek zein «funtzio» zuten Halboka egituran, «zeinak kartzeletako frontea ordezkatu baitzuen». Epaileen arabera, «ETA talde terroristan erabat integratuta» zegoen delako Halboka egitura. Ángela Murillo, Carmen Paloma González eta Juan Francisco Martel magistratuen arrazoibidean, Halboka egituraren barnean «fronte juridikoa» zegoen, abokatuek horretan parte hartzen zuten, eta «ETAko kideen defentsa juridikoa» egitetik harago abokatuek «lotura» egiten zuten presoen eta ETAren zuzendaritzaren artean: «Erakunde terroristaren ildoak transmititzen zizkieten».[25]

Sententziaren arabera, halaber, zigorturiko abokatuek «ETAren alde» lan egiten zuten Bilboko eta Hernaniko (Gipuzkoa) abokatuen bulegoetatik: «Norberak bere gaitasun profesionaletatik, [...] euren zerbitzuak talde terroristaren esanetara jarri zituzten; haien kokalekuetatik enkarguak bidali eta jasotzen zituzten, eta pertsonalki zuten harremana talde terroristako kide aktibo eta buruekin, askatasunez gabetutako euren afiliatuen ezagutza hobea lortzeko, horrekin euren konfiantza lortzeko, talde terroristarekin [...] estuki loturik segitzeko helburuarekin».[25]

Epaileek gaineratu zuten auzipetuek «ekintza eta helburu posibleak identifikatu eta seinalatzen» zituztela, eta «iraultza zerga biltzen laguntzen» zutela. Sententziaren arabera, aipaturiko delituak «egiaztatuta» gelditu ziren epaiketan aurkezturiko frogekin: bertzeak bertze akusatuen deklarazioak, Guardia Zibilaren lekukotzak, perituen txostenak eta «bereziki» miaketetan atzemandako dokumentu informatikoak aipatu zituzten —CNI Espainiako zerbitzu sekretuek parte hartu zuten horien desenkriptazioan—.[25]

Horiek kontuan hartuta, Espainiako Auzitegi Nazionaleko laugarren zigor salako epaileek ondorioztatu zuten zigorturiko lau abokatuen jarduerak bat egiten zuela «erakunde terroristako kide» izatearen delituarekin, «agerian gelditu» baitzen «laurek parte hartzen zutela erakunde terrorista horren helburuetan eta hartan militatzen zutela; ez zuzenean indarkeriazko ekintzak eginda, baizik eta askatasunik gabeko militanteen iraunkortasunean eta kohesioan lagunduta, bere garaian pertsona eta jabetzen aurkako ekintza ilegalak egiteko edo egiten saiatzeko babesa eman zien erakunde kriminalera lotuta segi zezaten».

Sententziak bere egin zuen epaiketan fiskalak defendatutako tesia. Epaileek frogatzat jo zituzten miaketetan atzemandako dokumentuak, erakusten zutelakoan «ETAren helburuekin bat egiten zuen jarduera bat» zutela, «mezuak kohesionatzeko eta ikerketapean, epaiketaren zain edo sententziak betearazten zeuden militanteak eta militante ohiak kontrolatzeko».[25] Magistratuek gutxietsi egin zuten CNIren parte-hartzea, ustezko delitu jarduera egiaztatzeko ekintzetan huts-hutsean alde teknikoan inplikatu zelakoan.[26] Bestalde, tortura kontakizunak eta kolpeak zein irainak jaso zituztela kontuan hartu arren eta salatzaileek trauma osteko estresa eta hainbat nahasmendu zituztela onartu arren, sententziak ez zituen egiaztatutzat hartu torturak.[26]

Balorazioa eta erreakzioak

Sententzia emandakoan, Aiert Larrarte, Jone Goirizelaia eta Alfonso Zenon akusatuen abokatuek epai horren balorazioa egin zuten, eta adierazi zuten epaiak balioztatu egiten zituela «CNIren parte hartze iluna, torturak, miaketa irregularrak eta non bis in idem printzipioaren urratzea». Iragarri zuten helegitea aurkeztuko zutela Espainiako Auzitegi Gorenean.[27]

LAB sindikatua izan zen lehena sententziari buruzko balorazio bat egiten, adieraziz «sententzia batzuk idatzita» daudela «epaiketa hasi baino lehen, eta 13/13 Sumarioa da horietako bat». Gerora defentsako abokatuek egin bezala non bis in idem printzipioaren urraketa salatu zuen, baita bidean gertatu «torturak eta atxilotuei egin sexu erasoak» ere. Euskal gatazkaren ondorioak konpontzeko ausardia ere erreklamatu zuten, baita demokraziaren premia aldeztu ere.[28]

Bestalde, Etxerat euskal presoen elkarteak ere sententzia kritikatu zuen, eta astakeria deitu. Arnaldo Otegi EH Bilduko koordinatzaileak gatazkaren konponbiderako zubiak hausteko ahalegina ikusi zuen. Sare mugimenduak plazaratu bideo batean, beste erakunde batzuek kritikatu puntu batzuez gain, salatu egin zuen epaimahaiak «berriz ere "Dena da ETA"ren argumentu guztiz bidegabera» jotzea.[28]

Espainiako Auzitegi Gorenaren sententzia

2026ko urtarrilaren 7an, apelazioan, Espainiako Auzitegi Gorenak babestu egin zuen Espainiako Auzitegi Nazionalaren sententzia, berretsiz Arantxa Zulueta eta Jon Enparantzaren kondenak, eta laburtuz Naia Zuriarrainenak zein Iker Sarriegirenak. Izan ere, Auzitegiak partzialki baietsi zituen Zuriarrain eta Sarriegiren helegiteak, argudiatuz haien erantzukizuna ez zela «hain larria; izan ere, ikertutako egituran mendeko kudeaketa lana eta erantzukizuna zen haiena, edo komunikaziokoa, eta ez da egiaztatu ahal izan konexio faktikorik zutenik indarkeria jardueretan». Horren ondorioz, lehenaren zigorra hiru urteko espetxealditik sei hilera jaitsi zen, eta bigarrenarena, hiru urtetik urtebete eta sei hilera.[29]

Gainera, Auzitegiak ezetsi egin zuen CNIren parte-hartzeari buruzko alegazioa. CNIk uko egin zion bere agenteek ikustaldian agertzeari, prozesua abian jartzeko ikerketan izan zuten rola azal zezaten. Izan ere, ez omen zen irregulartasunik atzeman haien jardueran, «egiaztatu [da] estaldura judiziala [izan duela], eta hura beharrizan eta proportzionaltasun printzipioei lotu zaiela». Bada, onartutzat jo zen hasieran CNIk egin ikerketa eta Guardia Zibilak ondutako txostena, lau kondenatuak ETAko kidetzat hartu zituena.[29] Espainiar justizia auzitegi horrek, halaber, ukatu egin zuen Auzitegi Nazionalak non bis in idem printzipioa urratu zuenik (bi aldiz gertaera beragatik epaitua izatea): lehenago banda terroristako kide izateagatik kondenatu zituzten ETAren egitura juridiko-kartzelarioari lotuta, baina Gorenak adierazi zuen kondena horren ostean ere denbora batez delitu horretan aritu zirela eta, beraz, beste gertaera bat zela epaitua, eta ez bera.[30]

Espainiako Auzitegi Gorenak zerbait ere esan zuen Zuriarrainek salatu torturen inguruan (derrigortzeak, irainak eta kolpeak, Guardia Zibilaren 2010eko atxiloaldian). Auzitegi horren 2026ko ebazpenak onartu egin zuen «perituen txostenen errealitatea», Istanbulgo Hitzarmenaren gomendioen arabera onduak. Txostenean, peritu psikologoek ontzat jo zuten bat zetozela salatutako gertaeren kontakizuna eta Zuriarrainek jasaten zuen sindrome postraumatikoa.[29] Hala ere, Auzitegiak azaldu zuen ez zegoela abusu horien «aztarna objektiborik». Are, gaineratu zuen Euskal Preso Politikoen Kolektiboko kide zenez, «zalantzan jartzekoa [zela] haren kontakizuna espontaneoa edo egiazkoa izatea, ezin baita berretsi objektiboki». Lakuak (Eusko Jaurlaritzak), berriz, torturaren biktimatzat aitortu du Zuriarrain.[29]

Espainiako Auzitegi Gorenak ez zuen aintzat hartu defentsak aurkeztutako alegazio bat ere. Zuluetaren eta Enparantzaren defentsak adierazi zuen «giza eskubide urraketa asko» egon zirela miaketetan eta ikerketan, eta iragarri helegitea aurkeztuko zuela Espainiako Konstituzio Auzitegian. Kondenatutako bi abokatuak baldintzapean aske jarraitu zuten epaia emateko unean.[31]

Elkartasuna

13/13 Sumarioaren kontrako manifestazioa Donostian
Juan Mari Jauregiren omenezko ekitaldia Egian, Donostian, prozesuan hil ondoren

Epaiketaren hasiera data ezagututa, herrietan eta hirietan jendea epaiketaren aurkako erantzuna antolatzen hasi zen, baita auzipetuei elkartasuna eta babesa adierazteko ekitaldiak ere. 2021eko ekainaren 26an eserialdia egin zuten Donostiako Egia kalean eta, epaiketa hasi baino bi egun lehenago, uztailaren 10ean, Donostian eta Bilbon manifestazioak egin zituzten.

Epaiketa irailean zen amaitzekoa, eta uztail erdialdean epaiketaren kritikariek iragarri zuten irailaren 12an manifestazio bat egingo zela Donostian, Kontxako Banderaren bigarren jardunaldian.[1] baita hala egin ere ehunka pertsonen partaidetzaz.[32] Bertan, Julen Zelarain auzipetuak salatu zuen "erakunde publiko eta alderdi gehienak izaten ari diren jarrera", bereziki nabarmenduz tortura lekukotzei buruz agertu zuten isiltasuna, eta Juan Mari Jauregi ekarri zuen gogora ere.[33] 2021eko irailaren hasieran, ekitaldi bat egin zen Zornotzan Saioa Agirreri elkartasuna adierazi eta tortura salatzeko.[34]

Sententzia eman eta egun batzuetara, haren kontrako eta kondenatuen aldeko manifestazioa deia egin zen apirilaren 11rako Donostian eta Bilbon, baita milaka pertsonaren parte-hartzea inguratu ere. "Dena da ETA" doktrina salatu zuten bertan, auzipetuei elkartasuna adierazi, eta Juan Mari Jauregi gogoratu. Epaiaren krudelkeria nabarmendu zuten.[35]

Espainiako Auzitegi Gorenak Auzitegi Nazionala babestu ondoren (2026ko urtarrilean), Arantxa Zulueta kide duen LAB sindikatuak elkartasun osoa adierazi zien kondenatuei, eta Auzitegiaren ebazpena «guztiz larritzat jo zuen, eta euskal herritarren bizikidetza demokratikoa eraikitzeko gogoaren kontrakoa».[29] Sare erakundearen iritziz, Gorenaren epaiak «intentzio politikoa» zuen.[36]

Prozesuaren kritikak

2021eko ekainean, 13/13 sumarioan akordioa sinatzeko eskatu zien Foro Sozialak alde guztiei, eta ohartarazi zuen 13/13 sumarioko epaiketak «eragin negatiboa» izan zezakeela bizikidetza demokratikoan.[37] EH Bilduko Julen Arzuagak "Dena da ETA" doktrina juridiko-politikoaren 25 urteko ibilbidearen azken ataltzat jo zuen 13/13 sumarioa, baita politikotzat jo ere, eta larria iritzi zion ETAk sueten iraunkor mugagabea deklaratu eta hamar urtera akusazio gogor hauek aurkeztea.[38] Uztailaren 10ean, EAJ, EH Bildu eta Elkarrekin Podemos-IU alderdiak epaiketaren kontra agertu ziren adierazpen baten bidez: Sumarioa «denboraz eta lekuz kanpo» dagoela adierazi zuten, eta «salbuespenezko legediaren aurka» zeudela berretsi.[39]

Prozesuaren azken etapan, zuzenbideko ehun profesionalek baino gehiagok, tartean zirela bost katedradun, adierazpen bat sinatu zuten, nabarmenduz "gehiago dirudiela beste garaietako sumario bat" eta gogora ekarriz bertan torturak salatu zirela eta defentsa eskubiderako bermeak urratu zirela, eta CNIk ugari parte hartu zuela, baina haien interbentzioko agirietan tatxoi ugariko pasarteak aurkeztu zituztela.[40]

2021eko uztailaren 19an, Demokraziaren eta Giza Eskubideen Aldeko Abokatuen Europako Elkarteak (ELDHk) irregularitateak egiaztatu ahal izan zituen epaiketan, hala nola Bilbo eta Donostiako abokatuen bulegoko polizia miaketetako berme falta. Ondorioz, bere kezka azaldu zuen; prozesua bertan behera geratzeko ere erreklamatu zuen.[41] Azaldu zuenez, "Turkian bezala, haien bezeroak ordezkatzeagatik auzipetu eta prozesatu dituzte defentsako abokatuak", Bilbo eta Donostiako bulegoetako Arantza Zulueta, Jon Enparantza eta Iker Sarriegiri erreferentzia eginez.[42]

Elkarteak gaineratu zuen sekretu profesionala urratu zela miaketa horietan, 2010eko apirilean gertatuak,[42] adierazi ere "Espainiak sistematikoki urratzen ditu[ela] abokatuen rolaren oinarrizko printzipioak", haien lana egiten uzten ez zielakoan.[41] Euskal Herriko bi psikologok Saioa Agirre eta Naia Zuriarrainen tortura salaketak egiaztatu eta balioztatu zituzten 2021eko irailaren 27an argitaratu txostenean, Istanbulgo Protokoloaren arabera egiaztapen azterketa egin ondoren.[18]

Oharrak

  1. ↑ Perals fiskala ezagun egin zen Altsasu auzian bere adierazpen gordinengatik, mami politiko handikoak.

Erreferentziak

  1. ↑ a b Iñaut Gonzalez de Matauko Radaren erreportaia Hirutxuloko Hitzan, 2021/07/16. [1]
  2. ↑ a b (Gaztelaniaz) «Denuncian que Zulueta y Enparantza padecen un régimen "ilegal" en la cárcel» La Vanguardia 2014-04-24 (kontsulta data: 2021-07-19).
  3. ↑ Alustiza, Maider. «Jon Enparantza eta Arantza Zulueta torturapean, noiz arte?» Berria (kontsulta data: 2021-07-21).
  4. ↑ Berria. «BABESARI KOLPEAK» Berria (kontsulta data: 2021-07-21).
  5. ↑ Berria.eus. «11/13 Makroepaiketa» Berria (kontsulta data: 2022-01-05).
  6. ↑ «Zulueta, Enparantza eta beste hiru atxilotu kartzelatu egin dituzte» EITB Euskal Irrati Telebista (kontsulta data: 2022-01-03).
  7. ↑ (Gaztelaniaz) SL, TAI GABE DIGITALA. (2021-07-13). «Los testimonios de torturas marcan la segunda sesión del juicio del sumario 13/13» naiz: (kontsulta data: 2021-07-14).
  8. ↑ a b «Guardia Zibilak 2008an Lopez Peñari hautemandako paperetan kokatu du ikerketaren abiapuntua» EITB Euskal Irrati Telebista 2021-07-14 (kontsulta data: 2021-07-14).
  9. ↑ SL, TAI GABE DIGITALA. (2021-09-03). «Juan Mari Jauregi hil da, 13/13 sumarioan auzipetu zuten Egiako militante abertzalea» naiz: (kontsulta data: 2021-09-05).
  10. ↑ (Gaztelaniaz) «Juzgan a Arantza Zulueta y a otros 8 abogados por el frente jurídico de ETA» La Vanguardia 2021-07-11 (kontsulta data: 2021-07-20).
  11. ↑ Iribarren, Maddi Ane Txoperena. «Defentsaren lekukoekin ekinen diote berriz 13/13 auziari, etzi» Berria (kontsulta data: 2021-09-24).
  12. ↑ (Gaztelaniaz) SL, TAI GABE DIGITALA. (2021-07-14). «La GC pone a CNI y papeles de López Peña en el origen del informe Halboka» naiz: (kontsulta data: 2021-07-15).
  13. ↑ a b c «Guardia Zibilak 2008an Lopez Peñari hautemandako paperetan kokatu du ikerketaren abiapuntua» EITB Euskal Irrati Telebista 2021-07-14 (kontsulta data: 2021-07-17).
  14. ↑ a b Alzuru, Jone Bastida. «13/13 auziko miaketetan izandako irregulartasunak salatu dituzte» Berria (kontsulta data: 2021-09-24).
  15. ↑ a b Iribarren, Maddi Ane Txoperena. «Guardia zibilen kontraerranak azaleratu ditu 13/13 auziko defentsak» Berria (kontsulta data: 2021-09-24).
  16. ↑ a b Iribarren, Maddi Ane Txoperena. «Guardia zibilen kontraerranak azaleratu ditu 13/13 auziko defentsak» Berria (kontsulta data: 2021-09-24).
  17. ↑ (Gaztelaniaz) SL, TAI GABE DIGITALA. (2021-09-22). «Murillo sigue con el juicio pese a que no se ha citado a agentes del CNI como testigos» naiz: (kontsulta data: 2021-09-24).
  18. ↑ a b Iribarren, Maddi Ane Txoperena. «Psikologoek sinesgarritasuna eman diete Saioa Agirreren eta Naia Zuriarrainen tortura testigantzei» Berria (kontsulta data: 2021-09-27).
  19. ↑ Txantiloi:Errefjoséerentzia
  20. ↑ Gorraiz, Uxue Rey. «13/13 auzian izandako irregulartasunak salatu dituzte ehun bat legelarik, manifestu batean» Berria (kontsulta data: 2021-11-11).
  21. ↑ «Fiskalak 13/13 sumarioko zigor eskaerari eutsi dio, baina Zelarainen aurkako akusazioa kenduta» EITB Euskal Irrati Telebista 2021-10-29 (kontsulta data: 2021-10-31).
  22. ↑ Iribarren, Maddi Ane Txoperena. «Fiskalak Zelarainen ez bertze guzien akusazioei eutsi die 13/13 epaiketan» Berria (kontsulta data: 2021-10-31).
  23. ↑ (Gaztelaniaz) SL, TAI GABE DIGITALA. (2021-11-03). «Las defensas insisten en subrayar que no se ha aclarado el papel del CNI y piden la nulidad» naiz: (kontsulta data: 2021-11-03).
  24. ↑ (Gaztelaniaz) SL, TAI GABE DIGITALA. (2022-03-31). «7,5 años de cárcel a Zulueta y entre 3 y 4 a Enparantza, Zuriarrain y Sarriegi» naiz: (kontsulta data: 2022-03-31).
  25. ↑ a b c d e f g Urain, Maddi Ane Txoperena Iribarren-Jon O.. «13/13 auziko lau auzipeturi espetxe zigorrak ezarri dizkie Espainiako Auzitegi Nazionalak» Berria (kontsulta data: 2022-03-31).
  26. ↑ a b (Gaztelaniaz) SL, TAI GABE DIGITALA. (2022-03-31). «7,5 años de cárcel a Zulueta y entre 3 y 4 a Enparantza, Zuriarrain y Sarriegi» naiz: (kontsulta data: 2022-04-02).
  27. ↑ Hermosilla, Gotzon. «Abokatuek uste dute 13/13 auziko epaiak torturak balioztatzen dituela» Berria (kontsulta data: 2022-04-07).
  28. ↑ a b (Gaztelaniaz) SL, TAI GABE DIGITALA. (2022-03-31). «7,5 años de cárcel a Zulueta y entre 3 y 4 a Enparantza, Zuriarrain y Sarriegi» naiz: (kontsulta data: 2022-04-13).
  29. ↑ a b c d e (Gaztelaniaz) SL, TAI GABE DIGITALA. (2026-01-07). «El Supremo confirma las condenas a Zulueta y Enparantza y reduce las de Zuriarrain y Sarriegi» naiz: (kontsulta data: 2026-01-07).
  30. ↑ (Gaztelaniaz) RTVE.es/EFE. (2026-01-07). «El Supremo confirma la condena a siete años y medio de cárcel a la abogada de presos de ETA Arantza Zulueta» RTVE.es (kontsulta data: 2026-01-07).
  31. ↑ «Zuluetaren eta Enparantzaren defentsak helegitea jarriko du Konstituzionalean» Berria 2026-01-08 (kontsulta data: 2026-01-08).
  32. ↑ Berria. «Ehunka lagunek babesa adierazi diete 13/13koei» Berria (kontsulta data: 2021-09-24).
  33. ↑ (Gaztelaniaz) SL, TAI GABE DIGITALA. (2021-09-12). «Manifestación en Donostia contra el 13/13, la tortura y en recuerdo a Juan Mari Jauregi» naiz: (kontsulta data: 2021-09-25).
  34. ↑ SL, TAI GABE DIGITALA. (2021-09-04). «Torturaren aurkako aldarria, 13/13 sumarioaren epaiketaren aurkako aldarria Zornotzan» naiz: (kontsulta data: 2021-09-05).
  35. ↑ «Milaka lagun kalean 13/13 sumarioko epaiaren aurka» Argia (kontsulta data: 2022-04-13).
  36. ↑ «Zuluetaren eta Enparantzaren defentsak helegitea jarriko du Konstituzionalean» Berria 2026-01-08 (kontsulta data: 2026-01-08).
  37. ↑ Agirre, Ainhoa Larretxea. «13/13 sumarioan akordioa sinatzeko eskatu die Foro Sozialak alde guztiei» Berria (kontsulta data: 2021-10-31).
  38. ↑ «Hasi da 13/13 sumarioko epaiketa: zortzi akusatu, ETAren "fronte juridikoa" osatzeagatik» EITB Euskal Irrati Telebista 2021-07-11 (kontsulta data: 2021-07-19).
  39. ↑ Urain, Jon O.. «13/13 auziaren aurka agertu dira EAJ, EH Bildu eta Elkarrekin Podemos-IU» Berria (kontsulta data: 2022-04-05).
  40. ↑ (Gaztelaniaz) SL, TAI GABE DIGITALA. (2021-11-11). «Un manifiesto de un centenar de juristas denuncia las irregularidades del proceso 13/13» naiz: (kontsulta data: 2021-11-11).
  41. ↑ a b (Gaztelaniaz) SL, TAI GABE DIGITALA. (2021-07-19). «La asociación europea de abogados ELDH reclama que se suspenda el juicio del 13/13» naiz: (kontsulta data: 2021-07-19).
  42. ↑ a b Urain, Jon O.. «ELDH Europako abokatuen elkarteak kezka agertu du 13/13 auziaren inguruan» Berria (kontsulta data: 2021-07-19).

Ikus, gainera

Kanpo estekak

Content Disclaimer

Informasi ini disarikan dari Wikipedia dan disajikan kembali untuk tujuan edukasi. Konten tersedia di bawah lisensi CC BY-SA 3.0. Kami tidak bertanggung jawab atas ketidakakuratan data yang bersumber dari kontribusi publik tersebut.

  1. The information displayed on this website is sourced in part or in whole from Wikipedia and has been adapted for the purpose of restating it. We strive to provide accurate and relevant information, however:
  2. There is no guarantee of absolute accuracy. Wikipedia is an open, collaborative project that can be edited by anyone, so information is subject to change.
  3. It is not intended to constitute professional advice. The content displayed is for informational and educational purposes only. For important decisions (e.g., medical, legal, or financial), please consult a professional.
  4. Content copyright. Wikipedia is licensed under the Creative Commons Attribution-ShareAlike License (CC BY-SA). This means that content may be reused with appropriate attribution and shared under a similar license.
  5. Responsible use. Any risk arising from the use of information from this website is entirely the responsibility of the user.
Index: pl ar de en es fr it arz nl ja pt ceb sv uk vi war zh ru af ast az bg zh-min-nan bn be ca cs cy da et el eo eu fa gl ko hi hr id he ka la lv lt hu mk ms min no nn ce uz kk ro simple sk sl sr sh fi ta tt th tg azb tr ur zh-yue hy my ace als am an hyw ban bjn map-bms ba be-tarask bcl bpy bar bs br cv nv eml hif fo fy ga gd gu hak ha hsb io ig ilo ia ie os is jv kn ht ku ckb ky mrj lb lij li lmo mai mg ml zh-classical mr xmf mzn cdo mn nap new ne frr oc mhr or as pa pnb ps pms nds crh qu sa sah sco sq scn si sd szl su sw tl shn te bug vec vo wa wuu yi yo diq bat-smg zu lad kbd ang smn ab roa-rup frp arc gn av ay bh bi bo bxr cbk-zam co za dag ary se pdc dv dsb myv ext fur gv gag inh ki glk gan guw xal haw rw kbp pam csb kw km kv koi kg gom ks gcr lo lbe ltg lez nia ln jbo lg mt mi tw mwl mdf mnw nqo fj nah na nds-nl nrm nov om pi pag pap pfl pcd krc kaa ksh rm rue sm sat sc trv stq nso sn cu so srn kab roa-tara tet tpi to chr tum tk tyv udm ug vep fiu-vro vls wo xh zea ty ak bm ch ny ee ff got iu ik kl mad cr pih ami pwn pnt dz rmy rn sg st tn ss ti din chy ts kcg ve
Prefix: a b c d e f g h i j k l m n o p q r s t u v w x y z 0 1 2 3 4 5 6 7 8 9

Portal di Ensiklopedia Dunia

Portal : Agama
Agama
Portal : Bahasa
Bahasa
Portal : Biografi
Biografi
Portal : Budaya
Budaya
Portal : Ekonomi
Ekonomi
Portal : Elektronika
Elektronika
Portal : Film
Film
Portal : Filsafat
Filsafat
Portal : Geografi
Geografi
Portal : Indonesia
Indonesia
Portal : Ilmu
Ilmu
Portal : Lingkungan
Lingkungan
Portal : Masyarakat
Masyarakat
Portal : Matematika
Matematika
Portal : Militer
Militer
Portal : Mitologi
Mitologi
Portal : Musik
Musik
Portal : Olahraga
Olahraga
Portal : Pendidikan
Pendidikan
Portal : Politik
Politik
Portal : Sastra
Sastra
Portal : Sejarah
Sejarah
Portal : Seni
Seni
Portal : Teknologi
Teknologi
Kembali kehalaman sebelumnya