Goizeder Abendibar

Goizeder Abendibar
Bizitza
Jaiotza	Mallabia, 2008ko apirilaren 3a (18 urte)
Herrialdea	Bizkaia, Euskal Herria
Hezkuntza
Hizkuntzak	euskara gaztelania
Jarduerak
Jarduerak	harri-jasotzailea

Goizeder Abendibar Areitio (Mallabia, Bizkaia, 2008ko apirilaren 3a) plazetan Goizeder modura harri jasotze modalitatean aritzen den bizkaitar herri-kirolaria da.^[1]

Mallabiko Zengotitabengoa baserriko alaba,^[2] bertako Learreta-Markina herri-eskolan egin zituen bere lehen ikasketak, eta Berrizko Institutuan hasi eta Durangokoan amaitu bigarrenak. Neskatoa zela sarritan joaten zen gurasoekin herri-kirol erakustaldiak ikustera eta betidanik erakarri izan dute. Plazarik plaza zebiltzan emakumeak erreferentetzat, etxekoei harria probatu nahi zuela aipatu, erabat gustatu eta 2024. urtean hasi zen entrenatzen Zarauzko Izetatarren eskolan, Joxe Ramon Iruretagoiena, Izeta II.aren esanetara. Berehalakoan hasi zen plazak egiten ere, erakustaldi eta txapelketa desberdinetan parte hartuz.^[3]

2024ko otsailaren 3an debutatu zuen Abadiñoko San Blasetan, udalaren enkarguz Luis Mari Bengoa herri-kirol sustatzaileak antolatutako jaialdian. Hunkigarria izan zen mallabitarrarentzako arbasoen eta ama Rosa Mariren jaioterrian, bere gaztaroko gogorapen ederrez betetako abadiñar plaza hartan egitea jendaurreko lehen agerpena. Gurasoak zutabe garrantzitsu bihurtu dira bere kirol ibilbidean: Asier aitak leku guztietara laguntzen dio eta gertu izaten du harriarekin entrenatzen dagoenean, gerrikoa lotzen, aholkuak ematen... Ama zein aita, txapelketetan biak ala biak izaten ditu ondoan, psikologikoki etengabe indarra eta konfiantza ematen.

Lurrean den harria (geometrikoa edo baldarra izan) sorbaldaraino jasotzeko erronkan, ahalik eta jasoaldi gehien eginez edo kilo gehien bizkarreratzen, laster konturatu zen indar handia izatea baino, garrantzitsuagoa teknika ona eskuratzea zela. Harri handiekin trebatu izan da, kolpea ematearena praktikatuz, hau da, harria paparrean jarri eta sorbaldara igotzeko kolpe edo mugimendu garrantzitsu hori landuz; harri txikiagoekin, ostera, indarra eta teknika landu izan ditu, hauspoa areagotu eta altxaldietan arnasketa kontrolpean izateko.^[3][4]

Sasoi baten plazetan aritzen ziren bakarrak mutilak ziren, baina pixkanaka neskak bistaratuz joan dira, egoera iraultzera arte eta erakustaldietarako ez dute ia mutilik eskatzen, ez daukate plazarik, neskak dabiltza batik bat herriz herriko horietan. Goizeder loraldi horren uzta da eta erakustaldi ugaritan hartu du parte, auzo, herri eta hiri askotako jai egitarauetan iragarriz bere izena.^{[5][6][7][8][9][10][11][12][13][14][15]}

Entrenatzerakoan, gizonek eta emakumeek egiten dituzten prestakuntza lanak ez direla berberak aipatu izan du, gorpuzkera zeharo desberdina dutelako. Aitortzen du hasieran ez zela erraza emakumeentzako entrenamenduak zehaztea, 50 urtez gizonei zuzenduta egon direnean. Oraindik emakumeen mugak zeintzuk diren ikasten ari direla erizten dio, gizonenak noraino irits daitezkeen jakin badakitenean. Batez besteko pisuan ere aldeak daude eta horrek eragina du altxaldi kopuruan.^[4]

Lehiatu izan den txapelketen zerrenda ere luzatuz doa: besteak beste, Gipuzkoako zein Euskadiko Kintopekoen Txapelketak, Gipuzkoako Emakumeen Txapelketa, Gipuzkoako Emakumezkoen Lau arroako Harri-jasotze Txapelketa, Emakume arteko Harrijasotzaile Azkarren Txapelketa…^{[3][16][17][18][19]}

2025ean, EITBko Harri Herri telebista saioaren bigarren edizioan parte hartzeko aukera etorri zitzaion eta, Ulia taldea ordezkatuz, 62,5 kiloko harri kubikoarekin lehiatu zen.^[20][21][22] Horixe da hain justu bere harririk gustukoena: teknikoki zailena omen da, baina hasieratik begi onez hartu eta altxatzeko orduan eskua hartuta dio.

• 2025eko otsailean, San Blasetako herri-kirol jaialdian, marka pertsonal modura, 75 kiloko kopa-harria 12 bider jaso zuen lepora bi minututan
• 2025ean, Harri Herri telebista saioan, txapeldun Mollarri taldearekin, Maddi Gesalaga, Zihara Zabala eta Eider Garcia Duranarekin laukotea osatuz
• 2025ean, Gipuzkoako Kintopeko txapelketan hirugarren
• 2025eko ekainean, Gipuzkoako Harri Txikietan seigarren^[23]
• 2025eko abuztuan, Lau Arroako txapelketan sailkatua eta finalean hirugarren postua eskuratu zuen^[24]
• 2025eko abuztuan, Donostiako Ulia Harrian zortzigarren, 14 altxaldi burututa^[25]
• 2025eko abuztuan, Tolosako Bedaio Harrian bigarren, 16 altxaldirekin^[26][27]
• 2025eko azaroan, Euskadiko Harri jasotze Txapelketan zilarrezko domina lortu zuen Abadiñon, hiru minututan harri zilindrikoari 43 altxaldi eta kubikoari 29 egin ostean^[28][29][30]