Sevdaliza

Sevdaliza
(2018) Irudi gehiago
Bizitza
Jaiotza	Teheran, 1987ko irailaren 1a (38 urte)
Herrialdea	Herbehereetako Erresuma
Hezkuntza
Hizkuntzak	persiera nederlandera ingelesa portugesa frantsesa
Jarduerak
Jarduerak	iritzi-kazetaria, egile abeslaria, zuzendari artistikoa, artista bisuala eta produktorea
Ibilbidea Taldeak Urteak Pos Zbk
Lan nabarmenak	ikusi Alibi
Izengoitia(k)	Sevdaliza
Genero artistikoa	musika elektronikoa
Musika instrumentua	ahotsa pianoa
Diskoetxea	Twisted Elegance
sevdaliza.com

Sevda Alizadeh (Teheran, Iran, 1987ko irailaren 1a),^[1] Sevdaliza izen artistikoagatik ezaguna, Herbehereetan bizi den kantautore, konpositore, ekoizle eta zuzendari irandarra da.^[2] 2015eko urtarrilaren 28a, The Suspended Kid izenburuko bere lehen EPa argitaratu zuen eta urte horretako azaroaren 24an bere bigarren EPa: Children of Silk; biak Twisted Elegance artista beraren zigilu diskografikoarekin.^[3]

2017an argitaratu zuen bere lehen estudioko albuma, Ison, eta ondoren hirugarren EP bat: The Calling izenekoa, 2018an.^[4]

2020an bigarren albuma, Shabrang, Muckyk koproduzitua.^[4] 2022an Raving Dahlia bere laugarren EPa argitaratu zuen.^[5]

Sevda Alizadeh 1987ko irailaren 1ean jaio zen Teheranen, Irango hiriburuan. Bost urte zituela, bere familiarekin Herbehereetara joan zen bizitzera errefuxiatu gisa.^[1] Hamasei urterekin joan zen etxetik saskibaloi beka batekin eta Herbehereetako sasakibaloi selekzioan jokatu zuen. Unibertsitatera joan zen eta lizentzitura eta komunikazioan masterra lortu zuenean, lanean hasi zen. Bere gogoko lanbidea ez zela konturatuta, hogeita lau urterekin musika egiten hasi zen. Partiturak irakurtzen eta instrumenturik jotzen ez jakin arren, orduak eman zituen estudioan abesten eta Ableton sekunetziadorea erabiltzen ikasten.^[6]

2014ko martxoaren 5ean «Clear Air» abestia argitaratu zuen, berak ekoiztu eta Gino Gervaesek zuzendutako bideo musikal batekin batera.^[7]

Ondoren, 2014ko ekainaren 4an «Sirens of the Caspian» eta urriaren 14an «Backseat Love» etorriko ziren, biak ere bideo musikal batekin batera.^[8][9]

2015eko urtarrilaren 28an, bere lehen EPa argitaratu zuen, The Suspended Kid, zenbait egoera sozialen aurrean (entrenatzailearekin edo laneko nagusiarekin ondo ez konpontzea, besteak beste) jendeak nola erantzuten zion adierazten zuena eta bere bizitzan bide berri bat aukeratu behar zuela ikusarazi ziotena. EPa Sevdalizak eta Mucky produktore neerlandarrak ekoiztu zuten.^[6]

2015eko ekainean argitaratu zuen «Marilyn Monroe» bere bigarren EPko lehen singlea eta, artistak aipatu zuenez, azala, beira edo zeta bezalako ehunduretan inspiratuta egongo litzateke.^[6][10]

Aro hau «That Other Girl» abestiaren bideo musikalaren aurkezpenarekin amaitu zen, Children of Silk EParen parte zena eta 2025eko irailak 1ean argitaratua izan zena.^[6][11]

2016ko maiatzaren 26an, Emmanuel Adjeik zuzendutako film labur bat argitaratu zuen Sevdalizak. Bertan, bi maitalek hausnarketa egiten dute maitasunaz, heriotzaz eta zoriontasunaz, nahi gabeko abortu baten ondoren, eta amaiera dramatiko batekin. Film laburra elkarrizketa labur batzuez eta artistaren hiru abestiz osatuta dago («The Formula», «The Language of Limbo» eta «Mad Woman»).^[12]

2016ko azaroaren 17an, «Human» abestia argitaratu zuen, berriz Adjei-k ekoitzitako musika-bideo batekin.^[13] «Human», «The Language of Limbo», «Amandine Insensible» eta «Marilyn Monroe» bere debuteko Ison albumaren parte izango ziren.

2017an kaleratu zuen bere lehen kanta persieraz, «Bebin», Donald Trump AEBetako presidentearen agindu exekutiboari erantzunez, zeinak errefuxiatu eta etorkinei herrialdean sartzea debekatzen baitzien modu mugagabean.^[14]

Ondoren, 2017ko apirilean, «Hero» albumaren bigarren singlea argitaratu zuen, eta, gero, «Hubris», diskoaren hirugarren singlea.^[15] 2017ko apirilaren 26an argitaratu zuen, azkenik, Ison debuteko albuma Sevdalizak. Hamasei abesti zituen, eta «Hear My Pain Heal» abestia gehituko zitzaion, albuma 2017ko azaroaren 21ean digitalki berrargitaratu zenean.^[16] Eguzkitik hurbil zegoen ISON kometaren izenari zor dio izena albumak. Abeslariak adierazi zuenez, diskoko abestiek beldur asko islatzen dituzte, baita mugarik gabekoak diruditen gauzak ere, haztea eta esperientzia, esaterako.^[1] Isonek 7,7ko puntuazioa jaso zuen Pitchfork-en eta 2017ko pop eta rhythm and blues album onenen zerrendan 12. postuan kokatu zen.^[17][18]

2018ko urtarrilean, «Soul Syncable» abestia argitaratu zuen, estudioko hirugarren EParen lehen aurrerapena.^[19] Otsailaren 26an «Human Nature» argitaratu zuen eta, «Soul Syncable» abestiarekin batera, martxoan argitaratu zenThe Calling EPa osatzen zuten.^[20]

2019ko martxoan «Darkest Hour» argitaratu zuen, bere bigarren estudioko Shabrang albuma izango zenaren lehen singlea.^[21] Horren ondoren, 2020ko urtarrilaren 30ean, «Oh My God» protesta-kanta etorri zen, Ameriketako Estatu Batuen eta Iranen artean gertatzen ari zen gerra ekonomikoari eta haien kultura-nortasunaren politizazioari erreferentzia egiten diona.^[22] Gero, martxoan, «Lamp Lady» kantua argitaratu zuen, eta maiatzaren 27an, «Joanna».^[23] Abuztuaren 19an, Sevdalizak «Habibi» argitaratu zuen eta, astebete geroago, Sevdalizak berak eta Anastasia Konovalova zinemagile errusiarrak ekoitzi eta zuzendutako abesti horren beraren bideo musikala argitaratu zuen, hau izan zen Shabrang albuma plazaratu aurreko azken singlea, 2020ko abuztuaren 28an.^{[22] [24]}

2020ko urrian, Sevdalizak Shabrang diskaren bi abesti jo zituen COLORSxSTUDIOS musika-plataforman: «Gole Bi Goldoon», plataforma hartan persierazko lehen abestia, eta «Dormant».^[25]

2021eko urrian Shabrang diskako «Oh My God» kantuaren birnahasketa argitaratu zuen, «Sleepnet»ekin batera;^[26] eta, azaroaren 24an, beste kantu bat kaleratu zuen «The Great Hope Desing».^[27]

2022ko urtarrilaren 19an, «High Alone» argitaratu zuen,^[28] aurreko biekin batera, Raving Dahlia EPa osatuz, Dahlia adimen artifizialarekin sortutako bere alteregoaren laguntzaz sortua, artistaren adierazpenen arabera, «arte-proiektu guztia ideia honetan oinarritu zen: Dahliak nire ordez esku har zezakeela, gizarteak zein norbanakoek ezarritako estandarren kopuru handia betetzeko gai ez naizenean».^[2]

2023ko ekainean, artistak Primavera Sound jaialdian jo zuen, non, bere kanturik enblematikoenak interpretatzeaz gain, bere hurrengo proiektuak primizian aurkeztu zituen, «Ride or Die» Villano Antillano abeslari portorrikarrarekin batera (TikToken biral bihurtu zena^[29][30]) eta «Nothing Lasts Forever» Grimesekin batera.^[31]

2023ko abuztuan, Myvoxekin kolaborazio berri bat iragarri zuen, bere IAko ahots eredu propioa, Dahlia, erabiltzeko aukera irekiz.^[32]

2023ko urriaren 23an, Sevdalizak bere sare sozialen bidez iragarriko zuen hurrengo «Nothing Lasts Forever» singlea Grimesekin elkarlanean kaleratuko zuela 2023ko azaroaren 3an.^[33]

2024ko ekainaren 28an kaleratu zuten «Alibi» singlea, Yseult eta Pabllo Vittarekin elkarlanean. Abesti horrek ospea lortu zuen hainbat herrialdetan, eta hainbat musika-zerrendatara iritsi zen.

2024ko urriaren 17an «No me cansaré» singlea plazaratu zuen, Karol G.rekin elkarlanean.