Amimôna fôssa fllor de burro

Anemone ranunculoides • Amimôna fôssa hèrba a burro, Risolèta jôna

Cél articllo est ècrit en arpetan supradialèctâl / ORB lârge.

Anemone ranunculoides

Amimôna fôssa fllor de burro

Cllassement

Règno	Plantae
Division	Magnoliophyta
Cllâssa	Magnoliopsida
Sot-cllâssa	Magnoliidae
Ôrdre	Ranunculales
Famelye	Ranunculaceae
Genro	Anemone

Èspèce

Anemone ranunculoides
L., 1753

L’amimôna fôssa fllor de burro^{[N 1]} [a.mi.ˈmoː.na ˈfoː.sa fʎɔːr də ˈby.ro]^[1],[2],[3] (Anemone ranunculoides ; du grèco anemos : « vent » et pués ranunculoides perce que sa fllor ressemble a cela d’una renoncula) est na planta folyèrua pèrèna de la famelye de les renonculacês, du genro de les amimônes.
O est na planta pas râra des desot-bouescs frès a tèrra reche d’una granta partia de l’Eropa et de l’Asia.

El est avouéc cognua coment l’amimôna fôssa hèrba a burro^{[N 2]} [a.mi.ˈmoː.na ˈfoː.θa ˈɛr.ba a ˈby.ro]^[2] en friborgês et pués la risolèta jôna^{[N 3]} [ri.zɔ.ˈlɛ.ta ˈdzoː.na]^[3] en vôdouès.

Semble brâvament a l’amimôna des bochalèts (vêre la dèscripcion de cel’èspèce) mas s’en distingue facilament per ses pètâles jônes. Cél caractèro fât pensar a na fllor de burro de la benda des botons d’or. Mas les fllors de burro ant na tige a fôlyes et pués des sèpâles vèrdes (caliço) desot les pètâles (ou ben les tèpâles).

Cela planta est abondenta en Eropa et en Asia, yô que fllorét dês mârs tant qu’a jouin.

Sè pôt crouesiér avouéc l’amimôna des bochalèts (Anemone × lipsiensis Beck), que balye na fllor d’un jôno franc pâlo.

Coment l’ensemblo de les amimônes et mémament la plepârt de les renonculacês, cela planta est poueson. Dêt pas étre empleyêe en farmacopâ ni suciêe ou ben consomâye.

1. ↑ (fr) « Gllossèro des patouès de la Suisse romanda », N’châtél, 1924-2018, vol. I, p. 411 (liére en legne : ANÉMONE, amimona) et pués vol. II, p. 371 (liére en legne : BEURRE, buro).
2. ↑ ^2,0  et ^2,1  (fr) Dictionnaire français-patois. Dikchenéro patê-franché, Fribôrg, Société cantonale des patoisans fribourgeois, 2013, p. 409 [→ amimôna], 572 [→ êrba a buro], 596 [→ fôtha] et pués 630 [→ hyà dè buro].
3. ↑ ^3,0  et ^3,1  (fr) Frèderic Dubôf, « Patois vaudois : Dictionnaire », èdicion reviua et complètâye, Ôron-la-Vela, Associacion vôdouèsa des amis du patouès, 2006, p. 19 [→ amimona], 44 [→ bûro], 52 [→ clliâo], 81 [→ dzauno-na], 106 [→ fau-ssa], 109 [→ flyâo] et pués 199 [→ risoletta].