Biosferowy rezerwat Hornjołužiska hola a haty

Biosferowy rezerwat Hornjołužiska hola a haty (němsce Biosphärenreservat Oberlausitzer Heide- und Teichlandschaft), w přirodnym rumje Hornjołužiska hola a hatowa krajina we wuchodnej Sakskej ležacy, je wot 1996 13. biosferowy rezerwat UNESCO w Němskej. Jónkrótneje přirody dla so wón spočatnje jako škitana krajina a wot 1994 jako biosferowy rezerwat wupokaza. Wón wopřija historisce zrosćenu kulturnu krajinu z bohatej přirodu a wosebitym woznamom za škit přirody a družinow.^[1] Zhromadnje ze sewjernym delnjołužiskim dźělom twori hornjołužiski biosferowy rezerwat najwjetšu zwisowacu hatowu krajinu srjedźneje Europy.^[2]

Srjedźišćo biosferoweho rezerwata je „Dom tysac hatow“ w Stróži pola Hućiny.

Biosferowy rezerwat Hornjołužiska hola a haty leži we wokrjesomaj Budyšin a Zhorjelc, mjez Wojerecami, Niskej, Běłej Wodu, Wósporkom a Budyšinom. Běžitej přez njón mjez druhim Sprjewja a Čorny Šepc.

1. ↑ Werner Hempel: Die Natur des Landkreises Bautzen. Lausitzer Druck- und Verlagshaus, Bautzen 2005, ISBN 978-3-930625-37-6, str. 147.
2. ↑ Böhnert, Buchwald und Reichhoff, Biosphärenreservat Oberlausitzer Heide- und Teichlandschaft (wud.): Biosphärenreservatsplan Teil 1. Grundlagen für Schutz, Pflege und Entwicklung. Mücka 1996. str. 9.

• Oficielne stronki (hsb.)