|
Þingeyjarsveit
 Wikimedia Commons er með margmiðlunarefni sem tengist Þingeyjarsveit. Þingeyjarsveit er sveitarfélag á Norðurlandi eystra, kennt við Þingey í Skjálfandafljóti. Sveitarfélagið varð til 9. júní 2002 við sameiningu fjögurra hreppa: Ljósavatnshrepps, Bárðdælahrepps, Hálshrepps og Reykdælahrepps. Í kjölfar atkvæðagreiðslu 26. apríl 2008 sameinaðist Þingeyjarsveit svo Aðaldælahreppi. Í atkvæðagreiðslu 5. júní 2021 samþykktu íbúar sveitarfélagsins sameiningu við Skútustaðahrepp með 65,2% greiddra atkvæða.[1] Sveitarfélögin sameinuðust undir nafni Þingeyjarsveitar í kjölfar sveitarstjórnarkosninga 2022. Þingeyjarsveit er stærsta sveitarfélag Íslands að flatarmáli og þekur um 12% landsins en byggð í sveitarfélaginu takmarkast við Fnjóskadal, Ljósavatnsskarð, Köldukinn, Bárðardal, Laxárdal, Aðaldal, Reykjadal og Mývatnssveit. Þéttbýliskjarnar eru á Laugum og Reykjahlíð. Megnið af landi sveitarfélagsins er í óbyggðum og nær það alveg inn á Vatnajökul. Þrjú stór vatnsföll renna um Þingeyjarsveit, Laxá í Laxárdal, Fnjóská í Fnjóskadal, Skjálfandafljót í Bárðardal. Í því síðarnefnda er Goðafoss nálægt Fosshóli við Þjóðveg 1. Að auki markar Jökulsá á Fjöllum mörk sveitarfélagsins í austri og þar er Dettifoss. Mývatn og umhverfi þess er mikið aðdráttarafl ferðamanna. Í Fnjóskadal er Vaglaskógur, vinsælt útivistarsvæði. Grunnskólar sveitafélagsins eru Stórutjarnarskóli á Stórutjörnum í Ljósavatnsskarði, Þingeyjarskóli á Hafralæk í Aðaldal og Reykjahlíðarskóli í Reykjahlíð. Á Laugum er einnig framhaldsskóli. Heimildir |
||||||||||||||||||||||||||||||||||||||
