|
დონალდ ტრამპი
დონალდ ჯონ ტრამპი (ინგლ. Donald John Trump; დ. 14 ივნისი, 1946, ნიუ-იორკი, აშშ) — ამერიკელი ბიზნესმენი და პოლიტიკოსი. ამერიკის შეერთებული შტატების 45-ე პრეზიდენტი 2017 წლის 20 იანვრიდან 2021 წლის 20 იანვრამდე და 47-ე პრეზიდენტი 2025 წლის 20 იანვრიდან. დონალდ ტრამპი ჰოლდინგური The Trump Organization-ის თავმჯდომარე და პრეზიდენტია, რომელიც შექმნილია ტრამპის უძრავი ქონებისა და სხვადასხვა ბიზნეს-ინტერესებისათვის. მისი თქმით, პრეზიდენტის პოსტის დაკავებამდე, იგი კომპანიაში თანამდებობას დატოვებს. საკუთარი მოღვაწეობის მანძილზე, ტრამპს მსოფლიოს მასშტაბით აშენებული აქვს საოფისე კოშკები, სასტუმროები, სამორინეები, გოლფის მოედნები და ბრენდირებული სხვადასხვა ობიექტები. ტრამპი დაიბადა და გაიზარდა ნიუ-იორკში. 1968 წელს ეკონომიკის ბაკალავრის ხარისხი მიიღო პენსილვანიის უნივერსიტეტის უორტონის სკოლაში. 1971 წელს მამამისის, ფრედ ტრამპისგან მემკვიდრეობით მიიღო უძრავი ქონება და სამშენებლო კომპანია, რომელსაც მოგვიანებით სახელი შეუცვალა და The Trump Organization დაარქვა. 1996-2015 წლებში ფლობდა სილამაზის კონკურს Miss USA-ს. 2000 წელს, საპრეზიდენტო არჩევნებში მონაწილეობა რეფორმების პარტიიდან სცადა, თუმცა ხმის მიცემის დაწყებამდე კანდიდატურა მოხსნა. 2004-2015 წლებში, ტელეარხ NBC-ზე მიჰყავდა რეალითი სატელევიზიო სერიალი The Apprentice. 2016 წელს, „Forbes“-ის მილიონერთა სიაში ტრამპი მსოფლიო მასშტაბით 324-ე ადგილს იკავებს, აშშ-ში კი 156-ე პოზიციას. 2015 წლის ივნისში, ტრამპმა საკუთარი თავი რესპუბლიკური პარტიის საპრეზიდენტო კანდიდატად წამოაყენა და სწრაფად იქცა კანდიდატობისთვის მებრძოლ რეალურ კანდიდატად თავისი პარტიიდან. 2016 წლის მაისში, მისმა რესპუბლიკელმა კონკურენტებმა თავიანთი კამპანია შეაჩერეს და უკვე ივლისში, ტრამპი ოფიციალურად დასახელდა პრეზიდენტობის კანდიდატად 2016 წლის არჩევნებზე. ტრამპის საარჩევნო კამპანიამ უპრეცედენტო ყურადღება ჰპოვა მედიისა და საერთაშორისო საზოგადოების მხრიდან. მისი მრავალი განცხადება ინტერვიუებში, Twitter-ზე და უშუალოდ კამპანიის დროს, საკამათო ან ყალბი აღმოჩნდა. ტრამპის პლატფორმა მოიცავს აშშ-ჩინეთის ხელშეკრულებების გადახედვას, ეწინააღმდეგება ისეთ მნიშვნელოვან სავაჭრო ხელშეკრულებებს, როგორებიცაა NAFTA და ტრანსწყნაროკეანური პარტნიორობა, საიმიგრაციო კანონმდებლობის გაძლიერება — მათ შორის, კედლის აშენება აშშ-მექსიკის საზღვარზე, ვეტერანებზე ზრუნვის პროგრამის რეფორმა, 2010 წელს განხორციელებული ჯანდაცვის რეფორმის გაუქმება და ჩანაცვლება, გადასახადების შემცირება. 2015 წლის ნოემბრის პარიზის ტერაქტების შემდეგ, ტრამპი გამოვიდა მოწოდებით დროებით აეკრძალათ მუსლიმთა იმიგრაცია აშშ-ში, მოგვიანებით კი განმარტა, რომ ეს აკრძალვა ძირითადად უნდა შეეხოს იმ ქვეყნებს, რომელთაც აშკარა ტერორიზმის ისტორია აქვთ, მანამ, სანამ პოტენციურ ტერორისტთა გამოვლენის სიტუაცია არ გაუმჯობესდება. 2012 წელს მიხეილ სააკაშვილმა დონალდ ტრამპი დააჯილდოვა ბრწყინვალების საპრეზიდენტო ორდენით, რომელიც გადაეცემა სხვადასხვა დარგის გამოჩენილ მოღვაწეებს საზოგადოებრივი ცხოვრების შესაბამის სფეროში გამორჩეული მიღწევებისათვის და საქართველოს წინაშე აღმატებული ღვაწლისათვის.[3] ადრეული ცხოვრებადონალდ ტრამპი დაიბადა ქალაქ ნიუ-იორკში, ქუინსში, Jamaica Estate სამშობიაროში და გაიზარდა გერმანულ-შოტლანდიურ ოჯახში.[4] მისი გერმანული წარმომავლობის მიუხედავად, მან არაერთხელ უარყო გერმანული წარმომავლობა და გერმანიასთან კავშირი. დედა შოტლანდიელი ანა მარი მაკლეოდი დაიბადა და გაიზარდა შოტლანდიაში, კუნძულ ლუისზე. დონალდი მუდამ აღნიშნავს და ხაზს უსმევს, რომ იგი ამერიკელია შოტლანდიური წარმომავლობით და შოტლანდიასთან ინარჩუნებს უწყვეტ ურთიერთობას. დედამისზე საუბრისას ყოველთვის ამაყად აცხადებს, რომ დედა, ანა მარი, ყველაზე მშვენიერი და გულთბილი ადამიანია, რომელსაც ძალიან უყვარს შოტლანდია და რა თქმა უნდა მისი დამსახურებაა ამ ქვეყნს მიმართ მისი გრძნობებიც. დონალდს შოტლანდიაში გახსნილი აქვს რამდენიმე გოლფის მოედანი, მან შეისყიდა და აღადგინა ერთ-ერთი უძველესი, 1906 წელს სამხრეთ-დასავლეთ შოტლანდიაში, აირშირში, ცნონილი არქიტექტორის ჯეიმს მილერის დიზაინით აშენებული გოლფის სასტუმრო თარნბერი, რომელიც აღდგენის შემდეგ დღეს წარმოდგენილია სასტუმრო თარნბერი რესორტის სახით, რასთან დაკავშირებითაც დონალდმა სიამაყათი განაცხადა გახსნის ცერემონიის დროს, რომ საკმაოდ ფრთხილი რესტავრაციის შემდეგ, დღეს თარნები რესორტი ევროპაში საუკეთესო გოლფის აკადემიაა. მისი განცხადებით შოტლანდიასთან დაკავშირებული ერთადერთი პრობლემა ისაა, რომ სურვილის მიუხედავად ხშირად ვერ ახერხებს შოტლანდიაში ფიზიკურად ჩასვლას. დონალდს ჰყავდა ოთხი და-ძმა, სამი მათგანი, მარიანა, ელისაბედი და რობერტი დღემდე ცოცხლები არიან, ხოლო უფროსი ძმა, ფრედ უმცროსი 1981 წელს ალკოჰოლური სასმელების მიღებით გარდაიცვალა. ტრამპმა განაცხადა, რომ ძმის მაგალითის გამო ერიდებოდა ალკოჰოლური სასმელების დალევას ან სიგარეტის მოხმარებას.[5] რესურსები ინტერნეტში ვიკისაწყობში არის გვერდი თემაზე:
სქოლიო
|
||||||||||||||||||||||||||||||||||||||||||||||||||||||||||
.svg)
.svg){kind=small}
