Aducazzione p''a pace

L'Aducazzione p''a Pace è nu prucesso pe se prucurà valùre e canuscenze e pe žveluppà attetùdene, capacetà e manère 'e se purtà, ca pônno servì pe campà armuniosamente cu isse stesse e cu ll'ata ggente. Aducà p''a pace serve p'arresolvere 'e cunflitte 'e 'na manera custruttiva e senza ausà 'a viulenza e, int''o stesso mumento, pe furmà 'a ggente – accumencianno d''e guagliune – a 'na cultura 'e pace.

L'Aducazzione p''a Pace s'abbàsa 'ncopp'a 'na filosefìa ca ce 'mpara: nunviulenza, ammore, cumpassione, feducia, cooperazziòne, rišpètto, e alleverènzia p''a razza 'e l'uòmmene e p''a vita 'e tuttuquanto 'o chianèta nuosto. 'E 'na pràteca suciale ca tocca nu campo interdisciplinare e globbale, pe' žveluppà 'a cuscienza d''a pace a tuttequante 'e levielle.

'O core d''e canuscenze 'mparate 'a ll'Aducazzione â Pace è 'nttènere 'e ddinàmeche 'e gruppo. Arìnto 'e ggruppe e 'mmiézo 'e ggruppe, putimmo truvà sempe ddoje manère pe sta' 'n relazzione cu' ll'ata ggente: 'a cumpetizzione e 'a cullabborazzione. 'A cumpetizzione špisso serve pe' fa' crescere ll'efficienza (p'essempio int''o špòrt o ll'economia), però pô pure purtà â destruzzione 'e nu cuncurrente, o 'e tuttequante 'e cuncurriente. L'Aducazzione p''a Pace 'nce serve propeto pe capì 'e situazzione ('e rìnto e chelle 'e fora) ca fanno addeventà letecùso nu gruppo e 'o portano a 'na cumpetizzione ca šcatàscia tuttecose. L'A.P. 'nce fa capì l'interazzione ca 'nce sta 'mmiézo a nu gruppo 'e perzone.; comme fa 'o gruppo a furmà 'na perzona, a mettere cierte perzone int'a cierte puzizzione e, però, pure comme 'na perzona pô 'nfruenzà 'o gruppo d''o sujo. L'A.P. se serve d''e canuscenze 'e base 'e: antropologgìa , storia, psicologgìa, economia e scienza puliteca. Essa avarrìa 'a fa' 'ntennere ca 'a razza 'e l'uommene è na parta d''a natura e ca 'n'organìsemo dinammeco cagna e se žvelùppa una continuazzione. L'A.P. ha dda 'mparà a l'uòmmene a piglià parta int''e decisione a tuttequante 'e levielle, a se furmà 'n'idea pricisa 'ncopp''e scelte puliteche e economeche, pe faticà 'nzieme a ll'ata ggente p'avé cchiù 'nfruènza 'ncopp'a ccheste decisiùne.

'A cumpetenzia cchiù 'mpurtante - 'mmiez'a tuttequante chelle 'e ll'A.P -, è 'a communicazziòne , pecché è stesso 'o core d''a feducia ca s'ha dda tené uno cu' ll'ato. 'A communicazziòne è, pirciò, 'a prencipale cundizzione p'arrivà â mediazziòne , ca serve p'arresolvere 'e situazzione 'e cunflitto senza 'a viulenza. Siconno l'Organizzazzione d''e Nazzione Aunite ca s'occupa 'e Cultura e Aducazzione (UNESCO), ll'A.P. s'averrìa žveluppà comme: (a) aducazzione ô žveluppo sustenibbele 'a ll'ambiente naturale, (b) prumuzzione d''o dialogo 'mmiézo 'e cculture defferente; (c) gestione custruttiva e nunviulenta d''e cunflitte.

• Mario Borrelli, Antonino Drago e Giovanni Salio (a cura di), Se vuoi la pace educa alla pace, Torino, Ed. Gruppo Abele, 1984
• Enza Paola Cela, Psicologia e nonviolenza, Edizioni Gruppo Abele, Torino
• Ermete Ferraro, Grammatica della Pace. Otto tesi per ll'Educazione Linguistica Nonviolenta, Torino, Ed. Satyagraha, 1983 ([[1]])
• Martin Jelfs, Tecniche di animazione, LDC, Torino
• Jerome K. Liss, La comunicazione ecologica, edizioni La Meridiana
• Sigrid Loos, 99 giochi cooperativi, Editrice Gruppo Abele, Torino
• Giuliana Martirani, La geografia come educazione allo sviluppo e alla pace, Edizioni Dehoniane, Napoli, 1985
• Montessori, Maria, Educazione e pace, Opera Nazionale Montessori, Roma 2004 (1949)
• Antonio Nanni, Claudio Economi, Educare alla pace nella scuola, La Scuola, Brescia 1987;
• Daniele Novara, Scegliere la pace - educazione al disarmo, Edizioni Gruppo Abele, Torino
• Daniele Novara, Scegliere la pace - educazione alla giustizia, Edizioni Gruppo Abele, Torino
• Daniele Novara, Scegliere la pace - educazione ai rapporti, Edizioni Gruppo Abele, Torino
• Daniele Novara, Scegliere la pace - guida metodologica, Edizioni Gruppo Abele, Torino
• Daniele Novara, Centro Psicopedagogico per la Pace e la gestione dei conflitti, Io non vinco, tu non perdi. Un kit per promuovere ll'educazione alla pace e la gestione dei conflitti tra ragazzi, UNICEF, Roma, 2004
• Rosenberg, Marshall B., Le parole sono finestre [oppure muri]. Introduzione alla Comunicazione Nonviolenta, Esserci, Reggio Emilia 2003 (Nonviolent Communication. A Language of Compassion, 1999)