Germanwings

De Germanwings GmbH weer en düütsche Billigfleger-Sellschop. Se is 2002 upmaakt wurrn un hett ehren Sitt in Köln. Dor hannelt sik dat um en Dochter-Unnernehmen vun de Lufthansa bi. Vun 2012 af an overnümmt se mit de Tied de Lufthansa ehre Törns in Düütschland un Europa, de nich over de ehre Dreihkrüze in Frankfurt un München flegen doot. Wat de Tahl vun de Flegers un de Passageere angeiht, is Germanwings dat drüddgröttste Flegerunnernehmen vun Düütschland. Germanwings höört nich to de IATA mit to. Af den 25. Oktober 2015 weer Germanwings kien eegenständig Floogsellschop mehr, stattdessen hett Eurowings de wertschapliche Verantwortung övernommen un hett fortan sämtliche Kört- un Langstreckenangebote ünner hör Marke anboden, wiels Germanwings den Floogbedriev in'n Updrag vun Eurowings dörführen dee. Lufthansa geev an'n 7. April 2020 bekannt, dat de Floogbedriev dör Germanwings düersam instellt wurrd.

An’n 3. Dezember 2014 hett de Upsichtsraat vun de Lufthansa tostimmt to dat „Wings-Konzept“, dat vun den Vorstand vorstellt wurrn weer. Vun Enne 2015 af an schall dat en nee „Wings-Holding“ geven, unner de ehre Flunken de Kort- un Langstreckenflöge vun Germanwings un Eurowings tohopenfaat weern schöllt. Se schöllt unner den neen Naam „Eurowings“ verkofft weern. For de langen Törns schöllt bit hen to seven Airbus A330-200 Flegers least weern. De schöllt denn vun SunExpress Düütschland bedreven weern.^[1]

Germanwings bedeent vun siene Statschonen in Köln, Stuttgart, Hamborg, Düsseldorp, Berlin-Tegel, Hannober un Düörpm um un bi 110 Flegerhabens in Düütschland, Europa un Noordafrika. Sunnerlich gaht de Germanwings-Törns na Städer un Urlaubsöörd, as Palma de Mallorca, Antalya, Barcelona oder London-Heathrow.

• An'n 19. Dezember 2010 hefft de Piloten bi en Törn mi den Airbus A319-132 vun Wien na Köln/Bonn en asigen Geruch in't Cockpit faststellt. Se menen, dat röök „verbrennt“ un „elektrisch“. Beide Piloten menen, dat gung jem nich goot. De Copilot föhl sik so schedderig, datt he nich mehr flegen konn. Beide Piloten hefft denn ehre Suerstoffmasken upsett un de Kaptein hett den Fleger seker up'e Eer brocht. Na de Bundsstell for Fleger-Unfallunnersöken konn nich rutfunnen weern, worüm dat in't Cockpit so unbannig stunken harr.^[2]

• An'n 24. März 2015 is en Airbus A320 in de Gemarken vun de Gemeen Prads-Haute-Bléone in dat Département Alpes-de-Haute-Provence in Süüdfrankriek in de Barge dunnert. De Fleger weer unnerwegens up den Törn 9525 vun Barcelona na Düsseldorp un harr 144 Passageere an Bord. All Lüde an Bord sünd bi düt Unglück umkamen. Kiek bi: Flegerunglück Germanwings 9525.

1. ↑ [1] „Eurowings“: Neue Konzepte für Wachstum, Lufthansa Pressemeldung, 2014-12-03, togrepen 2014-12-03}}
2. ↑ [2] Bundesstelle für Flugunfalluntersuchung, Untersuchungsbericht BFU 5X018-10, 25. November 2013, togrepen an'n 11. Dezember 2013