Front 242

Front 242 es un grop bèlga, fondat en 1981 oficialament a Aarschot, en region flamenca, mas per dos abitants de la vila de Brussèlas, Daniel Bressanutti e Dirk Bergen. Pauc de temps après, Jean-Luc De Meyer e Patrick Codenys intègran tanben lo grop.

Geography, lor primièr album, es publicat en 1982. Un pauc après, Dirk Bergen se tira del grop. Es alavetz remplaçat per Richard Jonckheere. Per completar, Tim Kroker acompanha lo grop sus l'empont a la batariá.

Eissit del movement new wave, Front 242 se referís especificament a Kraftwerk, lo grop avent contribuït per son influéncia a maridar la musica electronica ambe lo ròck, engendrant justament a la fin de las annadas 1970 aquel vast movement musical dich new wave.

Atal, Front 242 reïvindica tanben las influéncias de grops new wave basant coma eles lor musica sus la de Kraftwerk, coma per exemple Depeche Mode.

Pasmens, malgrat que lo cosinatge ambe la musica de Depeche Mode siá perceptibla dins la de Front 242, lor estili se'n desmarca francament per un aspècte fòrça mai pesuc e agressiu : atal, Front 242 es emblematic d'un sosgenre de la new wave a despart, l'electronic body music (EBM), curiós mescladís de musica electronica dirèctament inspirada de la de Kraftwerk ambe la radicalitat del punk, en descalatge complèt d'aquel ponch de vista ambe Depeche Mode qu'es un grop eissit de la pop. La predominança de l'electronica distinguís tanben l'EBM e Front 242 en particular d'un autre sosgenre de la new wave, lo ròck gotic, qu'el, al contrari, quitament se reivindica tanben l'eretatge punk (pòst-punk), garda lo ròck coma basa musicala e utiliza los sintetizors sonque coma un instrument d'aponch.