|
Kaminda Girigorio A. ''Nai'' CurieKaminda Girigorio A. Nai Curie Kaminda Girigorio A. ‘Nai’ Curie ta e kaya den e área di Montaña (Kòrsou) ku ta kuminsa na e krusada di Cocólodeweg i kaminda Jose C. Antonia bayendo direkshon sur-este te na kaminda di Montaña. Desde 30 di novèmber 2009 e kaminda aki ta karga e nòmber di Girigorio Apolinario Curie, persona ku a kontribuí na desaroyo sosial, kultural i deportivo di Montaña. Girigorio Apolinario ‘Nai’ CurieGirigorio Apolinario Curie (Kòrsou, 17 di novèmber 1905 - 19 di òktober 1983) a bini di un famia di 8 ruman, 4 muhé i 4 hòmber. E tabata e di 3 yu den e famia. Su mayornan tabata Simeon Maurice Curie i Thomasa Alexandrina Petrona. El a bishita skol básiko na Montaña i despues el a traha algun aña na Nieuwpoort. Dia 3 di febrüari 1925 el a drenta servisio di Shell Curaçao i a traha na e instalashon di bùnker na Caracasbaai. El a traha na Caracasbaai den e funshonnan di matroos, steigerwerker, tankmeter, pompman, machinedrijver, assistent wachtvoorman i desde yanüari 1955 komo operator te ku desèmber 1965, luna den kua el a baha ku penshun. El a sirbi e kompania Shell pa 40 aña. Girigorio Apolinario Curie tabata kasá ku Rebecca Cijntje. For di e matrimonio a nase 5 yu. Bida sosial i kulturalDen añanan 60 Girigorio Apolinario Curie huntu ku algun persona mas a lanta un organisashon sosial deportivo bou di nòmber di Sentro Sosial Montaña. E edifisio tabata situá na Hanenberg 18 den Jaluzie. E organisashon a trese un ambiente sosial agradabel den Banda’riba, organisando nochinan di sine i fiestanan bailabel. Den e klub aki a aktua hopi artista internashonal manera Celia Cruz, Johnny Pacheco, Eddy Palmieri, Joe Cuba, Gran Combo, Mighty Sparrow i Ismael Rivera. Tambe e tabata miembro di Komishon di Santana di Montaña. Bida polítikoGirigorio Apolinario Curie tabata tambe un di esnan ku for di mei mei di añanan 40 a forma parti di e grupo ku a prepará e kaminda pa Moises Frumencio Da Costa Gomez i otronan lanta Partido Nashonal di Pueblo (PNP) na april 1948. For di e momentu ey te na su morto na 1983, Girigorio Apolinario Curie a fungi komo lider di bario di Montaña Rey pa PNP. HonorNa april 1966 Girigorio Apolinario Curie a risibi un kondekorashon real komo "Kabayero" (ridder) den Orden di Oranje-Nassau. Referensia |
