A Kind of Magic (canzuna)

A Kind of Magic è na canzuna dî Queen, scritta di Roger Taylor e pubbricata comu secunnu sìngulu nnô discu A Kind of Magic dû 1986. Fu pubbricata 'n virsioni sìngulu, cu la b-side "A Dozen Red Roses for My Darling", lu 17 di marzu 1986 nnô Regnu Unitu e lu 4 di giugnu 1986 nnî Stati Uniti. La canzuna è prisenti nnô film Highlander – L'ultimu immortali nzemi a Who Wants to Live Forever. A Kind of Magic arrivau ô 1° postu nnî classìfichi di 35 nazziuni diversi.

La battuta «a kind of magic» (na speci di magia) è usata nnô film. Sta battuta cummuvìu assai Roger Taylor ca addicidìu di usàrila comu tema cintrali nnâ nova canzuna. Sunnu prisenti rifirimenti ô film nnô testu: «one prize, one goal» (nu premiu, nu unicu ntentu); «no mortal man» (nuddu omu murtali); «there can be only one» (cci nni pò arristari sulu unu), Taylor scrissi la miludìa e l'accordi pi la virsioni dû film. Freddie Mercury fici na nova parti di bassu, agghiuncìu lu break strumintali e canciau lu finali dâ canzuna. Foru Mercury e David Richards a prudùciri sta nova virsioni, poi misa nna l'album “A Kind of Magic”. La traccia urigginali di Taylor mmeci fu usata sulu pû film.

Ntô vidiu, Brian May, stranamenti, nun utilizza la so tradizziunali chitarra Red Special, ma na copia dû 1984. Mercury, vistutu di magu, trasi 'n na casa unni l'àutri cumpunenti dûû gruppu, vistuti comu vagabunni, stannu durmennu e vèninu arruspigghiati propriu dû sò ngressu. Poi lu gruppu cumpari vistutu nurmalmenti cu li sò strummenta. Duranti lu vidiu, fiuri di cartuna animati, abballannu ô rìttimu dâ mùsica.