Colonia

Na colonia la ze na casa rural aonde che la fameja che la la abita e la ghe laora entro no la ze parona de la stessa e del fondo, ma al ze vincolada co el paron da un contrato de mezadria. Sta situasion no la inplica al pagament de un afit stabilì a priori, ma la consegna del 50% (o de na frasion diversa) de tut al racolt. Par contro al paron al se inpegna a partecipar te la stessa mesura a pagar le spese che reguarda prodoti par la laorasion del fondo e le spese de manutension ordinaria de la casa e par eventuai assicurasion. Se da un lato sto contrato al se adata mejo a eventuai ani de magra, da que l'altra banda al inpone al colono de produser almanco al dopio de quel che al ze necessario par la so sussistensa anca te i ani co el racolt scars.

Al colono al ga anca al obligo de cener an registro (prima nota) aonde che al nota tute le spese e tuti i ricavi, scritura che la ga da esser visionada e aprovada dal paron.

Al controlo su i coloni serte olte no el gnea fat diretamente dal paron, ma da na persona de so fiducia ciamada de solito castaldo.

Tipico de tante case coloniche al ze al color ross-rosa de la pitura esterna, serte olte co un riquadro bianch te el qual gnea scrit al nome del paron e el numero de la colonia.

Na situasion particolar se la ga abuda quando che an sior de Polir, te el comune de Sess, no endo fioi al ghe ga assà tuti i so beni al Ospedal Civil de Feltre, domandando in canbio al posto let gratis par tuti i abitanti de Polir sensa limiti de tenp. Ghe n'è oncora dess le ex case coloniche co la dicitura "Ospedale Civile di Feltre.Colonia n°_".