Figà

El figà (anca ciamà fegal o fègato) el xe na giàndoła estramural anfìcrina (a secresion endòcrina ed exòcrina, el moła dónca ormoni drénto e fóra de sè) catada sóto del diaframa, infrà sto qua e el colon trasverso e el stómego. En proiesion su ła parete adominal de vanti el corisponde prinsipalménte al'ipocondrio de drita e in parte al'epigastrio e al'ipocondrio de sanca. El xe l'òrgano più grando del corpo uman daspò ła pełe. El xóga un rólo fondamental inte el metabołismo e el fa na serie de asion infrà łe cuałe l'imagaxenaménto del glicogeno, ła sìntexe de łe proteine del plasma e ła purificasion del sangue. El crea ła biłe, inportante inte i procesi de ła digestion e el xe fin al sesto méxe de vita drénto al ùtero el più importante òrgano emopoetico (chel crea sangue); in caxo de splenectomia, el figà el pol torse ła funsion de far el sangue co che el corpo el se cata sénsa milsa.

Etimolozia

Łe parołe che łe revarda el figà łe ga spéso l'agetivo "epàtego" o el prefiso "epato-", dal nome in łéngua greca del figà, ἣπαρ, ἣπατος (hepar, hepatos) ; el só nome in vèneto el salta fóra invese dal łatin iecur ficatum (figà coi fighi), na rexeta che ła piaxeva 'ntel'antiga Roma, che ła gera fata drio ingrasar, inpinar o cuxinar el figà d'oca co dei fighi.