Graneza

Granexa (o Granezza) xe na piana de foreste (bosco nero) a miłe doxento metri, suł'Altopian dei sete comuni, in provincia de Vicensa, drento el teritorio del comun de Lugo de Vicensa.

Łe prealpi vixentine xera xona de operasion de diverse formasion partixane inte ła seconda guera mondiałe. Anca suł'Altopian dei sete comuni. Granexa xera un posto dove ke i partixani i podeva stare e organisarse e in più xera un posto comodo par i Ałeati par far rivare i rifornimenti coi paracadute. A Granexa xe sta anca paradutà ła mision ałeata del magiore Wilkinson ("Freccia"). Sta postasion de partixani, proprio sui monti drio l'Alto Vixentin e łe vie de comunicasion coła Xermania, ła ghe dava tanto fastidio ai Todeschi e ai fasisti, così ke i ga deciso de fare un rastrełamento par destrùsare le forse de ła Rexistensa. Xa in agosto i gaveva tacà i partixani in Val Poxina e sułe montagne de łe Laste (malga Zonta), pi vanti i gavarìa fato el rastrełamento del Monte Grapa.

El 6 setenbre 1944 i naxisti i ga fato partire ł'operasion Hannover, tacando co blindati e soldà de tera de ła Luftwaffe, coi Rusi e i Ucraini del 263°Batajon orientałe de ła Wehrmacht, de stansa a Maran Vicentin, jutà dai fasisti de ła Brigata Nera Faggion de Vicensa e da ła Legione Tagliamento de ła Guardia Nasionałe Republicana. A difendere ła piana ghe xera i partixani dei Batajon 7 Comuni e Testolin de ła Brigata Mazzini. Naxisti e fasisti i xera in masa, co blindati e mortari, e a ła fin i xe vegnù fora dai boschi ocupando ła piana e copando tuti quei ke i trovava. Prima de poderse sganciare, i partixani i ga lasà morti sul canpo 22 de lori e 6 dispersi. In più, i naxisti i ga fuxiłà 14 autisti italian disertori ke se xera rifugià lì.

• Wikimedia Commons el detien imàjini o altri file so Granexa
• Scholia el detien schemi gràfeghi so Graneza