Mar dei Corałi

Mar dei Corałi

(en) Coral Sea (pl) Morze Koralowe
Sorte	Mar marzenałe
Parte de	Osèano Pasìfego e Osèano Pasìfego del Sud
Posto
Nasion rivaresca	Austràlia
Dati e sifre
Prodondità	9 175 m
Àrea	4 791 000 km²

El Mar dei Corałi (Coral Sea in inglexe) el xe un mar adiasente che fa parte de l'Oseano Pasifego Meridional e se cata a cavało del Tropico del Capricorno, tra łe coste de l'Austrałia a sudest e łe ìzołe de ła Mełanexia a nord e a ovest.

El ciapa el so nome da ła Gran Bariera Corałina che caraterixa łe so coste verso el continente.

El comunica verso nordest co eł Mar dei Arafura tramite el Streto de Tores, verso nord co el Mar de łe Sałomone, e verso sud co el Mar de Tasman. La so parte pi setentrional, łongo łe coste de ła Nova Guinea, se ciama Golfo de Papua, sempre a nord el toco xusto a est de ła Penìzoła de Cao Jorc se ciama Baja de ła Prinsipesa Carlota.

El xe un mar veramente tanto grando, e anca tanto fondo. La parte setentrional ła forma el Basin del Mar dei Corałi (fondo 4612 m), e a nordest se cata do fòse oseaniche: cheła de łe Sałomone (fonda 8310 m) e cheła Setentrional de łe Nove Ebridi (fonda 9175 m). Un rilievo marin tanto grando el xe el Platò del Cuinslan, a nordest de ła gran Bariera.

Sto mar el coverse ła piataforma continental inte ła so parte osidental, al sentro un fondal oseanico che se ga formà inte el senosoico inferior, co che jera drio a versarse na nova dorsal a est de l'Austrałia, e sul marxene oriental un importante arco insułar. Le so coste orientałi le xe particołarmente sogete al risċio de zunami, in particołar chełe de łe Sałomone e de łe Nove Ebridi, indove che se cata vulcani ativi.

De łe corenti oseaniche calde el ło atraversa in senso est-ovest da łe Ixołe Sałomone a ła Nova Guinea, indove che łe se separa inte ła Corente Sudecuatorial verso ovest e Corente de l'Austrałia Oriental verso sud.

El fiume pi importante che el se jeta intełe so acue el xe el Flai.

Tra łe ìzołe al so interno invese ghe xe l'Arsipełago Luisiad, la Nova Całedonia, łe ìzołe Cesterfild, e sora-de-tuto chełe formae da ła Gran Bariera Corałina.

Su łe so coste se cata łi Stati de Austrałia, Papua-Nova Guinea, Sałomone e Vanuatu, e el teritorio franxese de oltre mar de ła Nova Całedonia.

Le sità pi grandi de łe so coste łe xe Brisben, Gold Cost e Port Moresbi; tra i sentri de pesca se połe anca ricordar Mec Cei e Tounsvil.

No el xe un mar particołarmente pescoxo, ma se pol catar tóni e sardełe a sud, sgonbri łongo ła penìzoła de Cao Jorc e sora-de-tuto perle, inte el Streto de Tores, e inte łe aque de tuti łi arsipełaghi de ła Mełanexia.

Inte el Golfo de Papua se estrae gas naturałe, preso el campo de Pasco.

• Wikimedia Commons el detien imàjini o altri file so Mar dei Corałi
• Scholia el detien schemi gràfeghi so Mar dei Corałi

• Coralli, Mar deiTreccani.it – Enciclopedie on line, Istituto de ła Ençiclopedia Italiana.
• (EN) Coral SeaEnçiclopedia Britannica, Encyclopædia Britannica, Inc.
• (EN) Osèanografia del Mar dei Corałi e del Mar de Tasman