Petrolio

El petrolio (dal greco πέτρα = piera e έλαιο = ojo), anca dito oro nero, el xe un liquido infiamàbile, denso, de un color che pol ndar dal nero al maron scuro, passando dal verdognolo fin al zalo, che se cata in alcuni giacimenti drento i strati superiori de la crosta terestre. El xe fato da na miscela de vari idrocarburi (in prevalensa alcani, ma con variasion ne l'aspeto, ne la conposision e ne le proprietà fisico-chimiche).

El petrolio i lo conossea za ne l'antichità, specialmente in Oriente. Dove ghera qualche giacimento vizin a la superfice e quindi fàsile da rivarghe, i lo doparava par far medizine e bitume o par far ndar le lànpade a ojo. Anca Marco Polo el conta de aver visto un posto (inte la Zorzania de desso) in dove ghera na fontana de ojo che sgorgava da tera, e che i doparava par brusar. I bizantini dal petrolio i ricavava el famoso "fogo greco", na arma tremenda che i doparava in batalia par darghe fogo a le nave nemighe.

Inte el XX secolo el petrolio el xe deventà el conbustìbiłe pi doparà al mondo. Dal petrolio defati se ricava vari tipi de benzina, gasolio, nafta, cherosène che fa ndar machine, camion, treni, nave, aeroplani. Par el petrolio i vari Stati i ga fato un mucio de guere, anca par el fato che i paesi che dopara piassè petrolio no i ga giacimenti (o i ghe ne n'à massa pochi) e quindi ghe toca cronparlo dai paesi produtori, che de frecuente i tira sul prezo sercando de ciapar pi schei che se pol. El petrolio parò el xe na risorsa mia rinovàbile: ghe vole milioni de ani prima che el se fassa, e prima o dopo vegnarà che el se finisse. Elora i xe indrìo sercar dele fonti de energia alternative, come el vento o el sol.

I paesi che produse piassè petrolio i xe: Arabia Saudia, Russia, USA. Alcuni dei paesi produtori i xe riunìi ne l'OPEC.