Progresismo

El progresismo xe na vixion o tendensa pulitega (inte alguni caxi anca etica), inparentada co la socialdemocrasia e el liberałismo sociałe. El termine l'è sta doparà par la prima 'olta inte la fin del XIX secolo inte i Stati Unii e el se uxa par dirghe a le persone che le sostien la promosion dei diriti siviłi e sociałi, da ciapar parò in riforme progresive al posto che co na rivolusion sociałista o anarchica.

Inte la storia pulitega, el termine el vien fora co la rivolusion fransexe del 1789, portavoxe de le puliteghe iłuministe de la borghexia fransexe.

I progresisti i mira a modifegare i aspeti pułitesi, economisi e sociałi co riforme progresive. El se contrapone al conservatorismo. Storicamente le vien ciamade "progresiste" le forse che le se poxisiona a sanca, anca se oncò le vien ciamade progresiste le forse che le varda a le ideoloxie de la tersa via (Third Way).

Inte i ani, el progresismo xe divegnesto sinonemo de sociałismo liberale, anca se nasuo co orixeni difarenti. La tendensa la xe chela de metar insieme el pensiero liberale e de la propietà privada, co le garansie sociałi che ghe xe co la socialdemocrasia. Drento a l'internasional liberale i progresisti i xe raprexentai dal liberałismo sociale, i vole el libaro marcà ma anca a l'intervento publego, riforme in canpo pułitego e sociałe, cusì come drento a la socialdemocrasia ghe xe na corente de drita de sociałismo liberal, incarnada da Tony Blair e Gerhard Schröder, che la mira a la costrusion de on sentro progresista.