Puner

El puner, pułinèr o punaro el ze na costrusion fata par tegner le pite e/o gałine serade-su e al cuerto e co na parte al verto..

La prima de le do nesesità la ze ligada, dopo che un controlo su i animai, a na cuestion de sicuresa par evitar che serti animai come la volpi o i can randaji i pode ndar a brancar le pite.

El puner el pol esser fato de legno o co mur veri e propri, e de solito el ga senpre na porta de acesso pitost picenina par diminuir la dispersion de calor. Senpre par sta motivasion, na olta el sucedea da de frecuente che el gnesse ricavà inte na stanseta sora la stia dei porsełi. El seramento de solito el ze fato da un porteło co el teler de fero e stropà co rete fina, ma el pol èsar anca na portela de legn. Cofà seradura pol èsarghe un cadenaso o un sartareło. El aredamento interno el ze fato dal scałeto^{[Fonte nesesària]} (na strutura particolar, che la ghe someja a na scala a pecoi, aonde che le pite le ndazeva dormir) e da un serto numero de cassete inpienie de fien o de paja aonde che le pite le ndazeva far ovi e a coarli. La porta del puner la pol eser diretamente so na corte o su un pra, ma tante olte da so na recinsion ciamà serajo.

El serajo el ze un spàsio recintà aonde che le pite le ga magnera de pascolar. El pavimento el ze costituì da tera batesta o da pra, e el recinto da rede. I sostegni par el recinto i pol esser pai de gadia inpiantadi inte el teren, o da paleti de fero zincà co ła mureta che ła core drio tuto el perìmetro del punaro El porteło del puner de solito el ze fato co un teler de legno o de fer tanponà co rete fina. El pol gner serà co un cadenaso o co un sartarel. De solito ghe ze anca na magnadora e un cadin par l'acua. Serte olte el serajo el gnen cuerto co na rete a maje larghe de plàstega par parar le pite da eventuai agresion.

• Wikimedia Commons el detien imàjini o altri file so puner