Adelin Lebrun

Adelin Lebrun, c' esteut on scrijheu e walon ki skepia a Dinant li 24 di may 1888. Il mora e 1964.^[1]

Il a stî relî dins l' Antolodjeye des powetes walons namurwès.

Ouve e walon

I scrijha on ptit roman, «Å bea payis d' Han» (ki s' passe a Han-so-Lesse), eyet eto des arimés, del prôze et do teyåte, tos scrijhaedjes eplaidîs dins des gazetes e walon : L' Arsouye, Li Coirneu eyet Li Ban-cloke. Il esteut ossu publiyî dins des ptitès gazetes di Dinant.^[2]

Il a ramexhné sacwants arimés et tchansons dins on live "Bouket tot fwait", eplaidî a Nameur e 1913.

Djivêye di ses scrijhaedjes

Å bea payis d' Han Au bia payis di Han)
Boket tot fwait (Bouquet tout fait), eplaidî pa J.B. Collard, Nameur, 1913
Mes ptits xhîlteas (Mes ptits chûltias), eplaidî pa Justin Cherton, Nameur, 1920
Tchansons dinantesses, eplaidî dins Vers l'Avenir, Nameur, 1932
Dins les fleurs do Ptit Djezus, Dinant, 1942

Djudjmint so ses scrîts

Dins "Å bea payis d' Han", li scrijheu eploye bråmint des francijhaedje. Les arimés sont sovint må pîtés, et les rimes sont flåwes.^[3]

Portant gn a sovint des beas mots et des belès ratourneures.

Pôreut vali k' nos srént come leye
Di tenawete avou des djins… p. 65^[4]

Dins s' powezeye, i fwait sovint des ascoxhmints.

Les copixhes plinnes
di raedje corént avå tot bonzet roed.
Come des ptitès comeres,
elle alént d’ ene a l’ ôte, shonnént
si raconter totes leus mizeres.p. 67.^[4]

Accint do walon

Si accint do walon shonne vini di l' Eter-Sambe-et-Mouze^[5]. Li betchfessî scrijha ô (ey adon eto l' betchfessî oy) s' î trouvnut come a Fosse-li-Veye dizo disfondowe «ou» u «oû».

Disfondowes Lebrun do betchfessî ô
rifondowe å betchfessî ô	disfondowe Lebrun	pådje di «Dins les Fleûrs do Ptit Jésus»
fô	fou	57
sôre	soute	21,37
rôbe	roube	15
rôze	rouse	21
côp	coup	23, 29, 63
môde	moude	67
tchôze	chouse	15
ôte	oute	37, 59, 91, 103
ravôtieye	ravoutchiye	35
ôr	our	27, 131
disclôs	disclous	31
hôt	wout	103
tchôdès	tchoudès	101
sôrtixheut	sourteûve	113
rôlea	roulia	129
bôle	boul	117

Disfondowes Lebrun do betchfessî oy
rifondowe å betchfessî oy	disfondowe Lebrun	pådje di «Dins les Fleûrs do Ptit Jésus»
roye	roûye	57
voye	voûye	89
evoye	èvoûye	89
soye	soûye	35
foye (foû-rîle)	foûye	35

Pareymint po des disfondowes coûtchantreces do betchfessî oi:

Disfondowes Lebrun do betchfessî oi
rifondowe	disfondowe coûtchantrese corante	disfondowe Lebrun	pådje di «Dins les Fleûrs do Ptit Jésus»
målacoird	maulacôrd	maulacourd	33

Alére

Corwaitaedjes di si ouve cités dins l' Motî Coppe:

(fr) Jean-Louis Tellier, Vers l'Avenir, 9 di fevrî 1947.
(fr) Bulletin de l'Académie Royale de Langue et de Littérature françaises, tôme XXIV, prumî livret.

Difoûtrinne hårdêye

Pådje avou des scrijhaedjes da sinne (so l' Aberteke)
Li Wiccionaire si rsieve di sacwantès fråzes da Adelin Lebrun po-z enimådjî des mots k' i gn a.
Vos trouvroz des racsegnes so les ouves da Adelin Lebrun, u les ouves zeles-minmes, so Wikisourd e walon.

Sourdants

↑ Li 1î djanvî, sorlon l' eplaeçmint G2002 a Lefe; mins taiss ki c' est ene date administrative, pask' i n' ont nén sepou l' vraie djoû.
↑ Antolodjeye des powetes walons namurwès, p. 179
↑ Lucien Maréchal, live cité padzeu.
↑ ^4,0 et ^4,1 foû di: «Dins les Fleûrs do Ptit Jésus»
↑ Motoit di Lefe, la k' il este eteré.

[1] Li 1î djanvî, sorlon l' eplaeçmint G2002 a Lefe; mins taiss ki c' est ene date administrative, pask' i n' ont nén sepou l' vraie djoû.

[2] Antolodjeye des powetes walons namurwès, p. 179

[3] Lucien Maréchal, live cité padzeu.

[:0-4] 4,0 et ^4,1 foû di: «Dins les Fleûrs do Ptit Jésus»

[5] Motoit di Lefe, la k' il este eteré.

[1]

[2]

[3]

[4]

[5]