Fier a wåfes

Li fier å wåfes ou wåflî, c' est l' usteye po cure les wåfes.

C' est å pus sovint deus plakes di metå, avou des mouleures po fé les ptits cwårés des wåfes, ki s' raclapèt l' ene so l' ôte. Les plakes sont tchåfêyes, eyet on mete li cadon so ene des deus eyet raclaper l' ôte, pu leyî cure ene miete.

Dins l' tins les fiers a wåfe si metén sol feu d' ene sitouve (el plaece des cekes); on nd a eployî des sfwaits disk' ås anêyes 1970. Ces fiers la avént on longou mantche so tchake plake, po les poleur fé bodjî sins s' broûler.

A pårti des anêyes 1960 on cmince a-z eployî des wåflîs electrikes, i sont pus ptits la k' i n' ont nén des longous mantches; les plakes sont tchåfêyes avou ene rezistance å dvins d' l' apareil; et on rascovraedje di plastike (ou d' bakelite) waerantixhe li coujhneu po n' si nén broûler.

Li grandeu eyet l' cogne des wåfes pout candjî foirt, sorlon les redjons et les sôres di wåfes; ça fwait k' i gn a eto des fiers a wåfes foirt diferins; des cis po des rondès wåfes, des cwårêyès wåfes, et co des triyangulåres; et po des fenes ou co des spesses. Des wåflîs k' i gn a sont fwaits po les poleur ritourner do côp ki l' cadon est metou dvins, çoula fwait rintrer di pus d' air dins l' påsse eyet rind les wåfes pus spesses et ledjires.

Des wåflîs d' måjhone k' i gn a polèt eto siervi po griyi des croke-monsieu, tot replaeçant les plakes pa des ôtes fwaites po.

E l' Itåleye on trouve des rshonnantès usteyes po cure des galetes lomêyes pizzelle.