Logo do Parlamento de Galicia.Pazo do Hórreo, sede do Parlamento de Galicia.
As eleccións ao Parlamento de Galicia son as eleccións autonómicas nas que os cidadáns de Galicia elixen os membros do Parlamento de Galicia. O Parlamento de Galicia está composto por setenta e cinco parlamentarios. As últimas eleccións ao Parlamento de Galicia celebráronse en 2024.
Sistema electoral
Deputados por circunscrición (2024).
O Estatuto de Autonomía de Galicia de 1981 estabelece que os membros do Parlamento de Galicia son elixidos mediante sufraxio universal, igual, libre, directo e secreto.[1] Tamén estabelece que o Parlamento debe estar composto por un mínimo de sesenta deputados e un máximo de oitenta.[2] A Lei Electoral de Galicia estabelece a súa composición en setenta e cinco deputados.[3] Os parlamentarios elíxense mediante escrutinio proporcional plurinominal con listas pechadas en cada circunscrición electoral.
As circunscricións electorais do Parlamento de Galicia correspóndense coas catro provincias galegas.[1] A cada provincia correspóndelle un mínimo inicial de dez deputados. Os trinta e cinco deputados restantes distribúense entre as provincias en proporción á súa poboación.[3] Así, nas eleccións de 2016 a repartición foi o seguinte:
25 deputados á Coruña, 14 a Lugo, 14 a Ourense e 22 a Pontevedra.[4] A asignación de escanos ás listas electorais faise mediante o método D'Hondt.[5] A barreira electoral é do 5% dos votos válidos da circunscrición.[5]
Dende a reforma da LOREG de 2007, nas eleccións autonómicas de todas as comunidades autónomas as candidaturas deben presentar listas electorais cunha composición equilibrada de homes e mulleres, de forma que cada sexo supoña cando menos o 40% da lista.[6] Esta reforma foi recorrida polo Grupo Parlamentario Popular do Congreso dos Deputados perante o Tribunal Constitucional, que en 2008 concluíu que a reforma si era constitucional.[7]
No Parlamento de Galicia sentan 75 deputados e deputadas (71 nas dúas primeiras lexislaturas). A maioría absoluta son 38 deputados e deputadas (36 nas dúas primeiras lexislaturas).
.svg)
