Anbientałismo

Co anbientalismo o ecoloxismo se intede l'insieme de le scuminsiative puliteghe finalixade al mantegnimento e al mejoramento de l'anbiente naturale e anca un movimento sociale che serca de influensare el proseso pulitego faxendo presion, ativismo e istrusion par protexare le risorse naturali e i ecosistemi.

On anbientalista xe na persona che pole parlar del nostro anbiente natural e de la xestion sostenìbiłe de le so risorse traerso i canbiamenti inte le puliteghe publiche. On anbientalista vole che vegna fato un consumo informà, inisiative de conservasion e de riutilixo de le risorse. El vole i investimenti in risorse rinovabili, in economia ecoloxica. El movimento xe in fin insentrà su l'ecoloxia, la salute e i diriti dei omani e de le bestie.

• la conservasion de la Nadura e de i ecuilibri anbientali
• l'incuinamento
• la protesion de la fauna selvadega
• i ecosistemi e le aree protete
• la pulitega de xestion de łe mondisie
• la produsion agricoła biołoxega
• la xestion de le risorse enerxeteghe (co major intarese a le altre fonti de enerxia e a le rinovabiłi)
• l'eficentamento enerxetego
• altri ideali de svilupo (consumo critico, sviłupo sostenibiłe e decresita)
• i mutamenti climatisi
• la paxe

Drento la filoxofia anbientalista, se pole catar difarenti corenti, sia par i obietivi che i vole raxonxar, sia a come che i pensa che sia ciapà deso el ambiente:

• Ecosocialismo ed ecopasifismo: xe la corente pì a Sanca de l'anbientalismo, la corente ecoloxista del sociałismo. La ritien che el capitalismo e la globalixasion le sia le prinsipałi cauxe de l'incuinamento e de l'efeto sera, e la mira a modifegar el capitalismo fin rendedarlo mixurà co la popolasion e pì coreto inte i confronti co l'anbiente. Le so varianti pì estremiste a sinistra xe l'ecomarxismo e l'anarchismo verde, eredi de le ale ecoloxiste de movimenti come cuelo dei Hippie.
• Ecoloxia sociale: xe la corente de pensiero che segondo a sta qua, el sfrutamento de la nadura da parte de l'omo descrivaria na costrusion psicoloxega profonda inte la società umana, fondà sol binomio comando-obidiensa e che la ritien che par risolvare la cuestion ecoloxega, xe nesesario dasar stare i modeli de autorità e xerarchia soi del capitalismo.
• Animalismo: Sta corente de pensiero, no solo anbientalista, se dà el obietivo de la tutela dei animali. I animalisti i identifega uno dei majori problemi de la società de oncò inte el raporto che la spese umana ga co chele altre specie. Tante olte i promove el vegetarianexemo che l'é el major inpegno che i ga so la protesion dei diriti de le bestie. Tante xe le asociasion che laora in sta ideoloxia, come le ONG, LAV e LAC. Ghe xe on animalismo pì estremista, de dimension cee, come l'asociasion ALF che la se bate par la tutela de le bestie faxendo robe de frecuente ilegali.
• Liberałismo verde: el liberalismo verde el ritien che el mondo naturale xe on sistema in continuo canbiamento, e el serca de minimixare i malani fati da la specie umana sol mondo naturale e de jutar la rixenerasion de le xone danejade e incuinade par man de l'omo doparando ideoloxie liberali par cuestion sociali.
• Econasionalismo: corente de drita, concilia i conceti de nasion, etnonasionalismo e nasionalismo, co chel de l sistema ecoloxego, no volendo che inte el so teritorio ghe sia altre etnie inte la definision de nasion, i slarga sta ideoloxia a tuto l'ecosistema, cusì divegnendo econasionalismo. Par econasionalismo se intende ełora inparar a ver na consapevolesa de noi altri stesi che femo parte de na comunidà natural (la nasion). Partendo da la considerasion che la Tera la xe asociada a l'idea de Mare Nadura e che l'omo sia i so fioli, sti econasionalisti i ga na consesion de la Tera scuaxi tuta conpaga a chela dei Indiani d'Amerega.
• Ecofasismo: xe la corente de estrema drita de l'anbientalismo, la xe na corente del fasismo e del nasionalsocialismo. El mira a mejorar l'ambiente co mexi autoritari e antidemocratisi, abolendo struture incuinanti e favorendo le enerxie rinovabili, protexendo animali in maniera dura.
• Ecoterorismo: El se baxa so puliteghe anbientali pì estreme de l'ecofasismo, se prexenta so partii de Drita e de Sanca. I serca de mejorar l'anbiente desfando in maniera teroristega le struture incuinanti, miniere, sentrali nucleari ecc.

• Wikimedia Commons el detien imàjini o altri file so ecołozismo
• Scholia el detien schemi gràfeghi so Anbientałismo