Posa

Na posa la ze na opera idraulica che la gnen fata co el scopo de acumular e conservar na serta quantità de aqua pioana in modo da poder bearar le bestie anca ten posti aonde che no esiste sorgenti de aqua. In particolar la gnen doperada ten serte majolere in alta montagna o aonde che al teren al ze jarin.

Par far na posa se ciapa an posto che al sie còmet da donder, na s-cianta al pustern e che al sie te na zona de depresion del teren, in modo da er an bacino de racolta de le aque metoriche abastansa grant. A sto punto se scava an buss fondo circa an metro e co un diametro grando quant che se ritien necessario par le vache che se ga da bearar. Na olta fat sto tanto se fa an fondo stàbiłe de sass e se porta te el posto an bela poca de creda. la creda la ga da gner metesta te el fondo in modo da costituir an strato uniforme e inpermeabile. A sto punto basta spetar la pioa par far al colaudo.

Ogni an o ogni do ani ghe oree tornar a bater al fondo de creda in maniera che al se mancene conpatà e inpermeabile. na part del deposito organico al ze mejo eliminarla in modo che so nasse massa alghe dainpjenir tuta la posa o da forar la creda. Dopo qualche an de uso pol renderse necessario rifar al strato de creda.

Ghe gnen dat al nome de posa anca a opere tanto pì pisole che le gnen fate co el isteso procedimento te el caso che ghe sie na vena de aqua co na portata pisola. Qualche olta la parola la gnen doperada anca par ciamar al foss dintorn de na sorgente che no gnen sfrutada da un aquedoto.